საზოგადოება

პანკისის ხეობის უხუცესთა საბჭომ გუშინდელ სპეცოპერაციასთან დაკავშირებით ხელისუფლებას მიმართა

სოფელ დუისში პანკისის ხეობის უხუცესთა საბჭომ გუშინ ხეობაში ჩატარებულ სპეცოპერაციასთან დაკავშირებით ხელისუფლებას მიმართა.

საბჭომ ნეგატიურად შეაფასა სუს-ის მიერ გამოყენებული ფორმები, რომლის გამო 19 წლის თემირლან მაჩალიკაშვილმა მძიმე დაზიანებები მიიღო. ხეობის უხუცესებმა მოითხოვეს, აღნიშნული ფაქტი ობიექტურად გამოიძიონ.

„ჩვენ, პანკისის ხეობის მცხოვრებლები, დიდი ყურადღებით ვაკვირდებით უკანასკნელ პერიოდში პანკისის ხეობაში განვითარებულ მოვლენებს, რაც დაკავშირებულია ძალოვნების მიერ აქ ჩატარებულ სპეცოპერაციასთან. შექმნილ სიტუაციაში ჩვენი აზრი ერთსულოვანია იმასთან დაკავშირებით, რომ სახელმწიფო ხელისუფლების პრეროგატივაა საკუთარ ქვეყანაში წესრიგის დამყარება და ამ თვალსაზრისით გატარებული ღონისძიებების წინააღმდეგი არავინ არ არის.

მაგრამ ჩვენი უკმაყოფილება განპირობებულია იმ ფორმებისა და მეთოდების წინააღმდეგ, რომელთა გამოყენების შედეგად, ერთი ახალგაზრდა თემირლან მაჩალიკაშვილი უმძიმეს მდგომარეობაშია და მისი გადარჩენის საკითხი კითხვის ნიშნის ქვეშ დგას. ჩვენ ერთსულოვანი ვართ იმასთან დაკავშირებით, რომ გამოძიება ობიექტურად უნდა წარიმართოს და ყველაფერი უნდა გაკეთდეს, რომ უდანაშაულო ადამიანები არ მოხვდნენ განსასჯელის სკამზე. იმედს გამოვთვქვამთ, რომ ქართული ხელისუფლება გაითვალისწინებს პანკისის ხეობის საზოგადოების აზრს და სწორ მიმართულებას მისცემს აღნიშნულ საგამოძიებო მოქმედებას“, -ნათქვამია განცხადებაში, რომელსაც უხუცესები მთავრობას გაუგზავნიან.

სახელმწიფო უსაფრთხოების სამსახურმა თბილისსა და პანკისის ხეობის სოფლებში, ომალოსა და დუისში სპეცოპერაცია გუშინ ჩაატარა

სუს-ის ინფორმაციით, დაკავებულია საქართველოს ხუთი მოქალაქე, რომლებიც ახმედ ჩატაევს საქართველოს საზღვარზე გადმოსვლაში დაეხმარნენ.

სუსის ცნობით, დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსებზე.

დაკავებულთა შორის არის თემირლან მაჩალიკაშვილიც. სუს-ის ინფორმაციით, პოლიცია იძულებული გახდა პროპორციული ძალა გამოეყენებინა, ვინაიდან თემირლან მაჩალიკაშვილმა წინააღმდეგობის გაწევა და ხელყუმბარის მოქმედებაში მოყვანა სცადა.

დაჭრილი მაჩალიკაშვილის მდგომარეობა ამ დრომდე მძიმეა. ის კომატოზურ მდგომარეობაშია და მართვით სუნთქვაზეა შეერთებული. მას გუშინ ნეიროქირურგიული ოპერაცია ჩაუტარდა.

ანა მებურიშვილი