რეგიონები
პანკისში დააკავეს მამაკაცი, რომელიც მანქანით ბავშვებს დაეჯახა
პანკისის ხეობაში, სოფელ დუისში გამართულ საპროტესტო აქციაზე მამაკაცი დააკავეს. RegInfo-ის ცნობით, მან 15-მდე ბავშვისთვის ავტომობილის დაჯახება სცადა. ავტომანქანის შევარდნის შედეგად რამდენიმე ბავშვი მსუბუქად დაშავდა, ცუდად გახდა ქალი, რომელიც ინციდენტის თვითმხილველი იყო.
დაკავებული მამაკაცი იმ ერთ-ერთი ორგანიზაციის წარმომადგენელია, რომელიც „პანკისობა 2018“-ში იღებდა მონაწილეობას. მას შემდეგ, რაც ადგილობრივების პროტესტის შედეგად „პანკისობა“ ჩაიშალა, მამაკაცი მსუბუქი ავტომობილით, სავარაუდოდ, ნივთების ასაღებად, ღონისძიების ჩატარების ადგილზე მისვლას ცდილობდა. შესასვლელი ბავშვებს ჰქონდათ გადაკეტილი, მიუხედავად ამისა, მან ჯაჭვის გარღვევა სცადა და ბავშვებს შეეჯახა.
პოლიციელებმა, რომლებიც ადგილზე იყვნენ მობილიზებული, რეაგირება მხოლოდ მაშინ მოახდინეს, როდესაც ადგილობრივები მძღოლის მანქანიდან გადმოყვანას და მანქანის დაზიანებას ცდილობდნენ.
შსს-მ მომხდარზე გამოძიება სსკ-ის 276-ე მუხლის 1-ლი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს. დანაშაული ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით სამ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.