პოლიტიკა

პარლამენტმა ნარკოპოლიტიკის ლიბერალიზაციასთან დაკავშირებით მომზადებული საკანონმდებლო პაკეტის განხილვა შეაჩერა

პარლამენტი ნარკოპოლიტიკის ლიბერალიზაციასთან დაკავშირებით მომზადებულ საკანონმდებლო პაკეტს მარტის დასაწყისში განიხილავს.

ჯანდაცვის კომიტეტის თავმჯდომარემ - აკაკი ზოიძემ განაცხადა, რომ საკითხზე შეჯერება არა მხოლოდ უმრავლესობის შიგნით მოხდება, არამედ იმ ჯგუფებთანაც, რომელებმაც ამ პროცესში მონაწილეობის სურვილი გამოთქვეს.

“ორ კვირაში იმ შეთანხმების გამოტანას შევძლებთ, რომელზეც უმრავლესობა შეჯერდება. მათ შორის დაკონკრეტდება ზღვრული ოდენობები. კერძოდ, როგორ გაივლება ზღვარი მოხმარებასა და გასაღებას შორის, რაც ყველაზე კრიტიკული და პრინციპული საკითხია. ასევე ვისაუბრებთ იმაზე, რა დამატებითი ინსტრუმენტები შეიძლება იყოს პრევენციის. მთავარ პრინციპებზე ვთანხმდებით, რომელიც ეხება უკომპრომისო ბრძოლას ნარკოგამსაღებლების მიმართ, ნარკომომხმარებლების ზრუნვასა და რეინტეგრაციას, ასევე ნარკოპოლიტიკის მოხმარების პრევენციას”, – განაცხადა აკაკი ზოიძემ.

ამ ეტაპზე ცვლილებები მხოლოდ ჯანდაცვის კომიტეტს აქვს განხილული, სადაც პროექტი, პირველი მოსმენით, ოპოზიციის მხარდაჭერით გავიდა. აზრთა სხვადასხვაობაა მმართველ გუნდშიც.

საქართველოს პარლამენტის საგაზაფხულო სესია 6 თებერვალს გაიხსნა. ნარკოპოლიტიკის ლიბერალიზაციის საკითხი ერთ-ერთია იმ თემათა შორის, რომლებზე გადაწყვეტილების მიღებაც დეპუტატებს საგაზაფხულო სესიაზე მოუწევთ.

რეგლამენტის მიხედვით, საგაზაფხულო სესია თებერვლის პირველ სამშაბათს იხსნება და ივნისის ბოლო პარასკევს იხურება.

ცირა გურგენიძე