არქივი
საზოგადოება
პარლამენტში ონლაინ კაზინოებთან დაკავშირებით რეგულაციების გამკაცრებაზე მსჯელობენ
ონლაინ კაზინოებთან დაკავშირებით შესაძლოა რეგულაციები გამკაცრდეს.
ინიციატივის შესახებ პარლამენტის წევრებმა იურიდიულ საკითხთა კომიტეტზე იმსჯელეს, სადაც სამუშაო ჯგუფიც შეიქმნა.
როგორც ჟურნალისტებს იურიდიული კომიტეტის თავმჯდომარემ, ეკა ბესელიამ განუცხადა, აღნიშნული საკითხი ბევრ ადამიანს აწუხებს.
"ინიციატივაა შემოსული, რომ რადგანაც ძალიან ბევრ ადამიანს აწუხებს ეს თემა და იწვევს ძალიან ბევრ პრობლემას, გარკვეული სამართლიანი რეგულაციები შემუშავდეს. ჯგუფი იმუშავებს ამ ცვლილებებზე, დაელაპარაკება როგორც მომხმარებლებს, ისე კომპანიებს, ექსპერტებს და შემუშავდება ცვლილებები. ეს ხანგრძლივი სამუშაო პროცესი იქნება. რეგულაცია უნდა იყოს იმგვარი, რომ თავიდან ავირიდოთ მძიმე შედეგები", - განაცხადა საპარლამენტო უმრავლესობის წევრმა ეკა ბესელიამ.
საპარლამენტო უმრავლესობის წევრის, ლევან გოგიჩაიშვილის თქმით, სტატისტიკა ძალიან შემაშფოთებელია. მისი თქმით, საქართველოში აზარტულ თამაშებს 400 000-მდე მომხმარებელი ჰყავს.
"განსაკუთრებულ შეშფოთებას იწვევს არასრულწლოვანების აღნიშნულ თამაშებში ჩართვის დიდი რაოდენობა, 15-16 წლის ბავშვს შეუძლია თავისი მშობლის პირადობით დარეგისტრირდეს და გააგრძელოს თამაში. ვფიქრობთ, რომ ეს საკითხი საჭიროებს რეგულაციას", - ამბობს ლევან გოგიჩაიშვილი.
ნინო ექვთიმიშვილი