პოლიტიკა

პარლამენტში პირველი მოსმენით ჯარიმების გაზრდას მხარი დაუჭირეს

რეგიონული პოლიტიკისა და თვითმმართველობის საპარლამენტო კომიტეტმა პირველი მოსმენით მხარი დაუჭირა თბილისის მერიის მიერ დაანონსებულ ცვლილებებს ადმინისტრაციულ სამართალდარღვევათა კოდექსში, რომლის მიხედვით დედაქალაქში უნებართვო გარევაჭრობაზე, არაქართულენოვანი წარწერების განთავსებაზე, საზოგადოებრივი სივრცის იერსახის დაზიანებისა და უნებართვოდ ადგილების წარწერებისა და ნახატების განთავსებაზე ჯარიმები გაიზრდება.

საკითხი კიდევ 2 საკომიტეტო მოსმენის შემდეგ გავა.

ცვლილებების მიხედვით, უნებართვო გარევაჭრობაზე ჯარიმები 20-დან 50 ლარამდე გაიზრდება; არაქართულენოვანი წარწერების განთავსებაზე ფიზიკური პირი 200-ის ნაცვლად 1000 ლარით დაჯარიმდება, ხოლო იურიდიული - 300-ის ნაცვლად 3000 ლარით.

საზოგადოებრივი სივრცეების იერსახის დაზიანების შემთხვევაში, მათ შორის პოლიტიკური პლაკატების განთავსების შემთხვევაში ჯარიმა 50-ის ნაცვლად 200 ლარი იქნება; უნებართვოდ და აკრძალულ ადგილებზე წარწერებისა და ნახატების განთავსების შემთხვევაში ფინანსური სანქცია 500-დან 1000 ლარამდე იზრდება.