საზოგადოება

პარტიების კომუნიკაცია სადამკვირებლო ორგანიზაციებთან სცილდება ეთიკის ნორმებს - საერთაშორისო გამჭვირვალობა - საქართველო

არის შემთხვევები, როდესაც პოლიტიკური პარტიების კომუნიკაცია სადამკვირვებლო ორგანიზაციებთან სცილდება ეთიკის ნორმებს, განსაკუთრებით ოპოზიციური პარტიების მხრიდან, იმის გამო, რომ სადამკვირვებლო ორგანიზაციების შეფასებები მათ შეფასებებს არ ემთხვევა“, - ამის შესახებ ~საერთაშორისო გამჭვირვალობა - საქართველოს~ განცხადებაშია ნათქვამი.

ორგანიზაციის რეკომენდაციით, მნიშვნელოვანია, პოლიტიკურმა პარტიებმა სადამკვირვებლო ორგანიზაციებთან კომუნიკაცია იქონიონ ეთიკის ნორმების დაცვით.

„საერთაშორისო გამჭვირვალობა - საქართველო“ 8 ოქტომბრის არჩევნების პირველ ტურში და შემდეგ განვითარებული მოვლენების გათვალისწინებით სხვა რეკომენდაციებსაც ავრცელებს. ორგანიზაციაში მიიჩნევენ, რომ მნიშვნელოვანია გამოძიება დაიწყოს ზოგიერთი პარტიის ლიდერების განცხადებებზე, რომლის მიხედვითაც, საარჩევნო კომისიებში მათი წევრები მმართველი პარტიის ინტერესებს ატარებდნენ და ზოგ შემთხვევაში მოხდა მათზე ზეწოლა ან მოსყიდვა. გამოძიების აუცილებლობაზეა საუბარი ოპოზიციურად განწყობილი ამომრჩეველების მიმართ ზეწოლისა და ფიზიკური ძალადობის შესახებ გავრცელებულ ინფორმაციასთან დაკავშირებითაც, თუმცა აქვე, ორგანიზაცია პარტიებს მოუწოდებს, არ გაავრცელონ გადაუმოწმებელი ფაქტები.

რეკომენდაცია შეეხება ზოგიერთ საარჩევნო უბანზე და უბნის გარეთ მომხარი ფიზიკური დაპირისპირების ფაქტებსაც. ორგანიზაციის თქმით, მნიშვნელოვანია აღნიშნული ფაქტების პრევენცია, დაძაბულობის შემთხვევაში კი, აუცილებელია ასეთი სიტუაციების განმუხტვა. რეკომენდაციაში ასევე აღნიშნულია, რომ პოლიტიკურმა პარტიებმა უნდა მოუწოდონ თავიანთ აქტივისტებს, არჩევნების დღეს არ მოახდინონ დაძაბულობის პროვოცირება.

ორგანიზაციაში ასევე აცხადებენ, რომ საჭიროა, საარჩევნო კომისიის წევრებს კიდევ ერთხელ მკაფიოდ განემარტოთ არჩევნების წარმართვის წესები და პროცედურები. ასევე, საუბნო-საარჩევნო კომისიებიდან პარტიების წარმომადგენლების გაწვევის შემდეგ ახალი წევრების შერჩევისას არაკვალიფიციური კადრების მიღების თავიდან ასაცილებლად, ორგანიზაცია რეკომენდაციას ავრცელებს, სამომავლოდ შემოღებულ იქნას საარჩევნო ადმინისტრაციის მოხელის რეზერვის ინსტიტუტი.

მარი ნამგალაძე