საზოგადოება

„პარტიზანული მებაღეობის“ წევრებმა მერიაში მიმდინარე შეხვედრა პროტესტის ნიშნად დატოვეს

მოძრაობა ,,პარტიზანული მებაღეობის“ წარმომადგენლებმა თბილისის მერის, ბუნებისდამცველი ორგანიზაციებისა და ექსპერტების შეხვედრა პროტესტის ნიშნად დატოვეს.

,,პარტიზანული მებაღეობის“ აქტივისტებმა შეხვედრის დატოვების გადაწყვეტილება მას შემდეგ მიიღეს, რაც მათ მოთხოვნაზე - ეკოლოგიისა და გამწვანების სამსახურის უფროსისა და მისი მოადგილის გადადგომასთან დაკავშირებით, დედაქალაქის მერისგან დაპირება ვერ მიიღეს.

შეხვედრის დატოვებამდე, ორგანიზაციის წევრებმა განაცხადეს, რომ ამ შეხვედრას მერია საკუთარი პიარისთვის იყენებს და ბუნებისდამცველების მოთხოვნების დასაკმაყოფილებლად რეალური ნაბიჯების გადადგმას არ აპირებს.

გარდა ამისა, შეხვედრის მიმდინარეობისას, ჯანმრთელობის პრობლემები შეექმნა ,,პარტიზანული მებაღეობის“ მოშიმშილე აქტივისტს ელენე მალაშევსკი-ჯაყელს, რომელიც შეხვედრიდან გაიყვანეს.

ამ დროისთვის მერიაში ბუნებისდამცველი ორგანიზაციების ნაწილი, ექსპერტები, საკრებულოსა და მერიის წარმომადგენლები რჩებიან.

მარი ნამგალაძე