საზოგადოება

პასუხი უნდა გაეცეს, რატომ შესუსტდა ქვეყნის პოზიციები სტრატეგიულად უმნიშვნელოვანეს სფეროში - პრეზიდენტის პრესსპიკერი „გაზპრომზე“

სამშაბათის ტრადიციულ პრესკონფერენციაზე საქართველოს პრეზიდენტის პრესსპიკერმა ეკა მიშველაძემ ჟურნალისტებს გიორგი მარგველაშვილის პოზიცია გააცნო „გაზპრომთან“ დაკავშირებით.

მიშველაძის განცხადებით, პრეზიდენტი მოუწოდებს პარლამენტს, გააძლიეროს მეთვალყურეობა „გაზპრომთან“ დაკავშირებულ საკითხზე.

„პრეზიდენტი 2015 წლიდან მოყოლებული მუდმივად ამახვილებდა ყურადღებას, რომ ასეთ რთულ მოლაპარაკებებში უნდა მოხდეს სახელმწიფო რესურსის სრული მობილიზება და საერთაშორისო პარტნიორების ჩართვა იმისთვის, რომ ქვეყანა არ დარჩეს ისეთი სერიოზული სტრუქტურის პირისპირ, როგორიც არის „გაზპრომი“. პრეზიდენტის აზრით, ზარალის მინიმალიზება შეიძლებოდა, თუმცა, ეს გარკვეული მიზეზების გამო ვერ მოხერხდა. მიზეზები კი აუცილებლად დასადგენია, პასუხი უნდა გაეცეს კითხვებს და მათ შორის ყველაზე მთავარს, - რატომ მოხდა, რომ ამ სტრატეგიულად უმნიშვნელოვანეს სფეროში ქვეყნის პოზიციები შესუსტდა. საქართველოს პრეზიდენტი მოუწოდებს პარლამენტს, აქტიურად ჩაერთოს პროცესში, განახორციელოს მისი კონსტიტუციური ვალდებულება და გააძლიეროს საზედამხედველო ფუნქცია,“ - განაცხადა ეკა მიშველაძემ.

დღევანდელ პრესკონფერენციაზე მიშველაძემ ასევე ილაპარაკა პრეზიდენტის დამოკიდებულებაზე პრეზიდენტის არჩევის წესზე, ფარული საგამოძიებო მოქმედების განხორციელების შესახებ ახალ კანონპროექტზე, სასამართლო რეფორმის მესამე ტალღასთან დაკავშირებულ პაკეტზე პრეზიდენტის მიერ ვეტოს დადების საკითხზე, ოკუპირებულ ტერიტორიებზე მცხოვრებ მოსახლეობასა და ქვეყნის მიერ ქართველი ჯარისკაცების ინტერესების დაცვაზე.

ანა მებურიშვილი