პოლიტიკა

პასუხისმგებლობისგან თავის არიდება - ზუგდიდის მე-6 სკოლის გარდაცვლილი დირექტორის შვილი განათლების სამინისტროს განცხადებაზე

ზუგდიდის საჯარო სკოლის გარდაცვლილი დირექტორის, ია კერზაიას შვილმა ბაჩანა შენგელიამ განათლების სამინისტროს განცხადება პასუხისმგებლობისგან თავის არიდებად შეაფასა.

მისივე თქმით, იკვეთება კონკრეტული საჯარო მოხელეების მიერ ჩადენილი დანაშაული.

„სახეზე გვაქვს ჩვენ სისხლის სამართლის დანაშაული. პოლიტიზება რომელიმე მხრიდან თუ ჰქონდა ამ საკითხს, ჰქონდა მათი მხრიდან და შესაბამისად, ამ შემთხვევაში უკვე სახეზე გვაქვს კონკრეტული საჯარო მოხელეების მიერ ჩადენილ დანაშაულთან, რომელსაც მოჰყვა უმძიმესი შედეგი. წინასწარ საუბარი იმაზე, რომ ეს იყო დარღვევა და შესაბამისად, მათ ჰქონდათ ამ ყველაფრის გაკეთების უფლება, როგორც სადისტურად და როგორც არაადამიანურად მოექცნენ ამ სკოლასა და მის დირექტორს, ეს იქნება უბრალოდ პასუხისმგებლობისგან თავის არიდება და შესაბამისად, აღქმული იქნება როგორც მათი მხრიდან რაღაც ამ თემის, ესე ვთქვათ, დაფარვა“, - განაცხადა შენგელიამ და აღნიშნა, რომ საქმის გამოძიება სამინისტრომ სამართალდამცავ უწყებებს უნდა დაუთმოს.

საქართველოს განათლების, მეცნიერების, კულტურისა და სპორტის მინისტრის მოადგილის, ნათია ზედგინიძის განცხადებით, გარკვეული პოლიტიკური ძალების მიერ ზუგდიდის მე-6 საჯარო სკოლის დირექტორის, ია კერზაიას გარდაცვალების პოლიტიზირება უწყებისთვის კატეგორიულად მიუღებელია.

მისივე თქმით, უწყების მიერ დარღვევებისა და გადაცდომების შესახებ მომზადებული ანგარიშის მიუხედავად, ზუგდიდის მე-6 საჯარო სკოლის დირექტორს თანამდებობა შეუნარჩუნდა.

ცნობისთვის, ია კერზაია ქუთაისის ინტერვენციული მედიცინის ცენტრში 9 დეკემბერს გარდაიცვალა. ის სამედიცინო დაწესებულებაში 2 დეკემბერს ანევრიზმის დიაგნოზით მოათავსეს. ია კერზაიას სასწრაფო ოპერაცია გაუკეთდა, მას შემდეგ კი რეანიმაცულ განყოფილებაში იყო მოთავსებული, თუმცა პაციენტის გადარჩენა ვერ მოხერხდა.

კერზაიას შვილი ბაჩანა შენგელია დედის ჯანმრთელობის მდგომარეობის გაუარესებას მასზე განხორციელებულ პოლიტიკურ ზეწოლას უკავშირებდა, რომელსაც, მისი მტკიცებით, კერზაია ხელისუფლებისგან განიცდიდა

26 ნოემბერს ბაჩანა შენგელიამ ფეისბუკზე პოსტი გამოაქვეყნა, რომელშიც მან სკოლაში ინსპექტორების შესვლას პოლიტიკურ ანგარიშსწორებად შეაფასა. მისი თქმით, განათლების სამინისტროს ინსპექტირების სამსახურის ორი თანამშრომელი ერთი კვირის განმავლობაში შემოწმების მაგივრად „ჩვეულებრივ რეპრესიას“ ახორციელებდა. შენგელიას განცხადებით, ამ დროის განმავლობაში პარალიზებული იყო სასწავლო პროცესი, მიმდინარეობდა პედაგოგებისა და სკოლაში დასაქმებული თანამშრომლების დაკითხვა.

მისივე თქმით, ეს ყველაფერი იმიტომ ხდებოდა, რომ დედამისი მიუხედავად არაერთი „შეთავაზებისა“, არ გახდა „ქართული ოცნების“ აქტივისტი და არჩევნების წინ არ გადასცა მათ ე.წ. მომხრეების სია.