პოლიტიკა

პატიმრობა თავად მელიამ და პირველ რიგში მიხეილ სააკაშვილმა გადაწყვიტა - მამუკა მდინარაძე

ოპოზიცია პარტნიორების განცხადებებში უსმენს, უყურებს და ტირაჟირებს მხოლოდ იმას, რაც მათ აწყობთ, რაც ორმაგი სტანდარტია, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

„ჩვენ კრიტიკას და რჩევებს ყურადღებით ვუსმენთ მათგან განსხვავებით. ისინი არ უსმენენ. გასაგებია კრიტიკა რომელიც ბოლო დღეების განმავლობაში მივიღეთ და ამას ჩვენ ვითვალისწინებთ მოქმედებებში და ვუპირისპირებთ არგუმენტებსაც, ჩვენი საზოგადოების განწყობას ვუხსნით, მათ შორის, განსაკუთრებით პირად კომუნიკაციაში,"- აცხადებს მდინარაძე.

რაც შეეხება პოლიტიკური მიკერძოების კუთხით არსებულ კითხვებს, როგორც მდინარაძე ამბობს, ნიკა მელიას გირაო რომ გადაეხადა, რაც არ უნდა სურვილი ჰქონოდა ხელისუფლებას, მას ვერ დააპატიმრებდნენ.

„ასე რომ მისი პატიმრობა თავად მელიამ და პირველ რიგში მიხეილ სააკაშვილმა გადაწყვიტა. ამით მან ორი კურდღელი დაიჭირა, ერთი ის, რომ შიდა კონკურენტი მოიშორა, მეორე ის, რომ მელიასგან უნდათ ისეთი პერსონის გამოყვანა, რომლის ირგვლივაც მოხდება საზოგადოების კონსოლიდაცია, თუმცა, ეს ასე არ იქნება",- განაცხადა მდინარაძემ.