საზოგადოება

პატრიარქის ეპისტოლეში ნარკოპოლიტიკის შესახებ მინიშნებები პირდაპირ ემთხვევა მთავრობისა და სამინისტროს გეგმებს - თეა წულუკიანი

იუსტიციის მინისტრის, თეა წულუკიანის განცხადებით, პატრიარქის საშობაო ეპისტოლეს ნაწილი ნარკოპოლიტიკაზე უწყების გეგმებს ემთხვევა.

მინისტრის თქმით, მნიშვნელოვანია ევროპული სტილის სარეაბილიტაციო სისტემის ჩამოყალიბება.

„პატრიარქის ეპისტოლეში ნარკოპოლიტიკის სასურველი მიმართულებების შესახებ მინიშნებები თუ ცალსახა განცხადებები პირდაპირ ემთხვევა იმ გეგმებს, რაც ჩვენს მთავრობას, იუსტიციის სამინისტროსა და ნარკოტიკების წინააღმდეგ უწყებათაშორის საბჭოს ჰქონდა და აქვს 2013 წლიდან. უნდა შეიქმნას ჩვენს ქვეყანაში რეაბილიტაციის სისტემა ნამდვილი, ევროპული სტილის, რომელიც დღეს ჩვენ ასევე არ გვაქვს. ამ ყველაფერის გარეშე, რა თქმა უნდა, ძნელია, ვისაუბროთ დაბალანსებულ ნარკოპოლიტიკაზე. ძნელია, გვქონდეს იმედი, რომ რომელიმე ნაჩქარევად მიღებული კანონი რაიმე შედეგს მოიტანს და არ იქნება, პირიქით, წამქეზებელი ეფექტის“, -თქვა წულუკიანმა.

საქართველოს კათოლიკოს-პატრიარქის, ილია მეორის საშობა ეპისტოლეში წერია, რომ ნარკოპოლიტიკამ ამ უმძიმეს სენთან მიმართებით უარყოფითი განწყობა უნდა შექმნას და ახალგაზრდები დაიცვას.

პატრიარქის აზრით, უნდა აშენდეს სარეაბილიტაციო ცენტრები და სასკოლო ასაკიდანვე ამაღლდეს მოსწავლეთა ცნობიერება.

ანა მებურიშვილი