საზოგადოება

პატრიარქმა დაკავებული დეკანოზის მონახულების სურვილი გამოთქვა - უჩა ნანუაშვილი

კათოლიკოს-პატრიარქს აქვს სურვილი შეხვდეს დეკანოზ გიორგი მამალაძეს, - განუცხადა ჟურნალისტებს დღეს სახალხო დამცველმა უჩა ნანუაშვილმა, რომელმაც პატრიარქი გუშინ მოინახულა.

ომბუდსმენის თქმით, ილია მეორემ დაკავებული დეკანოზის მონახულების სურვილი მასთან შეხვედრისას გამოთქვა.

ამასთან, როგორც ნანუაშვილმა აღნიშნა, აუცილებელია დაცვის მხარისთვის გაუთქმელობის ხელწერილზე პირობების შეცვლა.

„იმ პირობებში, როცა პროკურატურის წარმომადგენლების მხრიდან არა ერთი საჯარო განცხადება გაკეთდა, სამწუხაროდ, დაცვას საკუთარი არგუმენტების გაზიარების შესაძლებობა არ ეძლევა. ჩემი აზრით, ეს არის სერიოზული დარღვევა. ამ ფონზე ახალი ადვოკატისათვის გარკვეული პირობების წაყენება მეტ კითხვის ნიშნებს წარმოშობს“, - განაცხადა ნანუაშვილმა ჟურნალისტებთან საუბრისას.

რაც შეეხება პატრიარქთან შეხვედრას, სახალხო დამცველის თქმით, ის დაინტერესებულია, გაიგოს მეტი ინფორმაცია, თუ რა მოხდა და იმედი აქვს, რომ მალე ყველაფერს ნათელი მოეფინება.

„ის ასევე საუბრობს, რომ აუცილებელია მაქსიმალურად დაწყნარდეს სიტუაცია, მღელვარება დაცხრეს და სიმართლე გაირკვეს“, - აღნიშნა ნანუაშვილმა.

ნინო ექვთიმიშვილი