უახლესი ამბები
არქივი
პოლიტიკა
,,პატრიოტთა ალიანსი’’ პარლამენტის რიგგარეშე სესიას ბოიკიტს უცხადებს
,,პატრიოტთა ალიანსი’’ პარლამენტის რიგგარეშე სესიაში მონაწილეობას არ მიიღებს.
ფრაქცია ,,საქართველოს პატრიოტების’’ წევრმა, პარლამენტის ვიცე-სპიკერმა ირმა ინაშვილმა თანაგუნდელებთან ერთად გამართულ ბრიფინგზე აღნიშნული გადაწყვეტილების მიზეზები განმარტა.
მისი თქმით, ბოიკოტის ერთ-ერთი მიზეზი უმრავლესობის მიერ შემუშავებული ე.წ. მოსმენების შესახებ კანონპროექტია.
ინაშვილი პარლამენტს პროექტის ალტერნატიულ ვარიანტსაც სთავაზობდა, რომელიც კიბერუსაფრთხოების სპეციალური სამსახურის შექმნას ითვალისწინებს.
,,აუცილებელია შეიქმნას კიბერუსაფრთხოების ძალიან მძლავრი სამსახური თავისი ელექტრონული დაზვერვის და კონტრდაზვერვის სტრუქტურებით. ეს სულ სხვა ტიპის სამსახურია და ჩვენ ამ მოდელზე ვსაუბრობდით სხვადასხვა ტიპის შეხვედრის დროს, მაგრამ ცხადია, უმრავლესობა არ ითვალისწინებს ოპოზიციის ცალკეულ შენიშვნებსა და მოსაზრებებს. მისთვის მთავარია, რომ ძალაში შევიდეს ეს კანონპროექტი, ამიტომ, ჩვენ არ მივიღებთ იმ პოლიტიკურ სპექტაკლში მონაწილეობას, სადაც პინგ-პონგს ეთამაშებიან ერთმანეთს ,,ქართული ოცნება’’ და „ნაციონალური მოძრაობა’’, - განაცხადა ირმა ინაშვილმა.
კიდევ ერთი მიზეზი, რის გამოც ,,საქართველოს პატრიოტები’’ რიგარეშე სხდომას არ დაესწრებიან, ნდობის ჯგუფის დაკომპლექტების წესია. ,,პატრიოტთა ალიანსი’’ უკმაყოფილია კვოტების გადანაწილების სისტემით, რის გამოც, მათი წარმომადგენელი ნდობის ჯგუფში ვერ მოხვდება.
ცნობისათვის: საქართველოს პრეზიდენტის განკარგულებით, 1 მარტს პარლამენტის რიგგარეშე სხდომა გაიმართება. სხდომა 12:00 საათზეა ჩანიშნული.
განკარგულების მიხედვით, სხდომაზე მხოლოდ ერთ საკითხს, ფარული საგამოძიებო მოქმედებების შესახებ კანონპროექტს განიხილავენ და მესამე მოსმენით უყრიან კენჭს.
ნინო ექვთიმიშვილი