პოლიტიკა

ქართველი ხალხი უკრაინისადმი ძალიან დიდ სოლიდარობას გამოხატავს - სალომე ზურაბიშვილი

ვფიქრობ, ქართველი ხალხი უკრაინისადმი ძალიან დიდ სოლიდარობას გამოხატავს, მთავრობა და სახელმწიფო ყველაფერს აკეთებს, რაც კი შეიძლება, გაკეთდეს ოკუპირებული ქვეყნის მიერ, – ამის შესახებ საქართველოს პრეზიდენტმა, სალომე ზურაბიშვილმა „ევრონიუსთან“ ინტერვიუში განაცხადა.

უკრაინაში მიმდინარე ომზე საუბრისას საქართველოს პრეზიდენტმა აღნიშნა, რომ „რუსეთმა დაიწყო ეს მასშტაბური აგრესია ყველანაირი მოტივისა და პროვოკაციის გარეშე“.

„არ ვთვლი, რომ საქართველოში ხალხი ფრუსტრირებულია. ვფიქრობ, ქართველი ხალხი ძალიან დიდ სოლიდარობას გამოხატავს. როგორც უკვე ვთქვი, მთავრობა და სახელმწიფო ყველაფერს აკეთებს, რაც კი შეიძლება, გაკეთდეს ოკუპირებული ქვეყნის მიერ. დანარჩენი კეთდება მოსახლეობის მიერ, მხარდაჭერის გამოხატვა – ექიმები მიდიან, მოხალისეები და არ არის საჭირო საქართველოსთვის რაიმე სახის პროვოკაციის შექმნა, რაც შეიძლება, მოგვიანებით გამოყენებული იქნეს. ჩვენ გვაქვს ძალიან კარგი მაგალითი, თუ როგორ მოქმედებს ვოლოდიმირ ზელენსკი, რომ არ იყოს პროვოკატორი და რუსეთს გამოაცალოს ყველანაირი არგუმენტი. შესაბამისად, ნათელია, რომ რუსეთმა დაიწყო ეს მასშტაბური აგრესია ყველანაირი მოტივისა და პროვოკაციის გარეშე. საქართველოც სწორედ ასე იქცევა“, – განაცხადა სალომე ზურაბიშვილმა.

რაც შეეხება უკრაინაში საქართველოდან მოხალისეების წასვლის საკითხს, ზურაბიშვილის თქმით, ეს არ არის მთავრობის გადასაწყვეტი და როგორც სხვა ქვეყნებიდან, საქართველოდანაც მოხალისეები „საკუთარი გზით მიდიან“.

„ბევრი პროპაგანდაა. ქართველი მოხალისეები, ისევე როგორც სხვა ქვეყნებში, როგორც მოხალისეები საკუთარი გზით წავიდნენ, ეს არ არის მთავრობის გადასაწყვეტი საკითხი. ეს შეკითხვები სახელმწიფო დეპარტამენტის პრესმდივანსაც დაუსვეს და მან ძალიან კარგად ახსნა, რომ საქართველოს ტერიტორიების 20 პროცენტი ოკუპირებულია, ფრონტის წინა ხაზზე მდგომი, ზუსტად ისე ვერ იქცევა, როგორც ნატო-ს წევრი სახელმწიფო, რომელიც ბევრი სხვადასხვა გზითაა დაცული. თუმცა ეს არ ასუსტებს საქართველოს სახელმწიფოს სოლიდარობას, რასაც მე გამოვხატავ, ქართველი ხალხის სოლიდარობას, რომლებიც დემონსტრაციებს ატარებდნენ. უკრაინისადმი არის სრული მხარდაჭერა“, – განაცხადა სალომე ზურაბიშვილმა.