პოლიტიკა

პოლიტიკური დიალოგი კიევსა და თბილისს შორის ახალ იმპულსს იძენს - ვლადიმირ ზელენსკი

უკრაინის პრეზიდენტის, ვლადიმირ ზელენსკის განცხადებით, პოლიტიკური დიალოგი კიევსა და თბილისს შორის ახალ იმპულსს იძენს. ამის შესახებ მან საქართველოს პრეზიდენტ სალომე ზურაბიშვილთან ოფიციალური შეხვედრის შემდეგ გამართულ ერთობლივ პრესკონფერენციაზე განაცხადა.

„მოხარული ვარ მივესალმო ქალბატონ სალომე ზურაბიშვილს და ჩვენს ქართველ მეგობრებს მეგობრულ უკრაინაში. ეს არის პირველი ოფიციალური ვიზიტი, რომელიც ძალიან მნიშვნელოვანია ჩვენს ქვეყნებს შორის სტრატეგიული პარტნიორობის განმტკიცებისთვის. პოლიტიკური დიალოგი კიევსა და თბილისს შორის ახალ იმპულსს იძენს. ჩვენი ერთობლივი ამოცანაა, უკრაინასა და საქართველოს სტრატეგიული პარტიორობის ფორმატი შევავსოთ რეალური შინაარსით, კონკრეტული პროექტებით ურთიერთმხარდაჭერისა და ჩვენს შორის ნდობის დიდი დონის საფუძველზე. უკრაინასა და საქართველოს აერთიანებთ ერთობლივი მიზნები ევროკავშირსა და ნატო-ში სრულფასოვანი წევრობის მოპოვებასთან დაკავშირებით. ასევე უნდა აღვნიშნო ჩვენი პოზიციის მსგავსება აღმოსავლეთ პარტნიორობის შემდგომ განვითარებასთან დაკავშირებით. უკრაინისთვის და ჩვენი პარტიორებისთვის ერთ-ერთი მნიშვნელოვანი ამოცანაა შავი ზღვის რეგიონში უსაფრთხოების თანამშრომლობის გაძლიერება. შავი ზღვა უნდა იყოს უსაფრთხო აკვატორია თავისუფალი ვაჭრობისა და ნაოსნობისთვის. ჩვენ ვცდილობთ გავაძლიეროთ ურთიერთობა ჩვენი პარტნიორი სახელმწიფოების ფლოტებს შორის შავ ზღვაში. აქტიურად ვმუშაობთ ამ ინიციატივის რეალიზაციასთან დაკავშირებით საქართველოსა და სხვა მეზობლებთან და იმედი მაქვს, მალე ჩვენ ვიხილავთ პროგრესს“, - განაცხადა ზელენსკიმ.