საზოგადოება

პოლიციამ ძალის გამოყენებით მოვაჭრეებს კარავი არ გააშლევინა - ფრიდონ სიხუაშვილი

მთავრობის ადმინისტრაციასთან „ბავშვთა სამყაროში“ გაჩენილი ხანძრის შედეგად დაზარალებულ მოვაჭრეებსა და სამართალდამცავებს შორის ფიზიკური დაპირისპირება მოხდა. სიტუაცია მას შემდეგ გამწვავდა, რაც მოვაჭრეებმა კარვების გაშლა დაიწყეს.

მოვაჭრეთა უფლებადამცველის ფრიდონ სიხუაშვილის თქმით, მერიამ თანხმობა განუცხადა კარვების გაშლაზე, თუმცა პოლიციამ ამისი წერილობითი დადასტურება მოსთხოვა.

„13 მარტიდან ამ ადამიანებმა[მოვაჭრეებმა] მიმართეს მერიას, მათ მიაწოდეს ინფორმაცია. თვით მერმა განაცხადა, რომ ამ ადამიანებს აქვს ამის კანონიერი უფლება და მათ არანაირი წერილობითი თანხმობა არ სჭირდებოდათ, მაგრამ საპატრულო პოლიციამ დაჟინებით მოითხოვა ამის წერილობითი დადასტურება. ასეთ რამეს კანონი არ იცნობს, ამიტომ ამ ადამიანების შეკრებისა და მანიფესტაციის ხელყოფა ხდებოდა ყოველდღიურად, მათ არ ეძლეოდათ კარვების გახსნის შესაძლებლობა. დღეს, როგორც იქნა, მოხერხდა, ამ ხალხმა მოიტანა კარვები, გაშალეს და თქვენ თვითონ შეესწარით, როგორი ძალის გამოყენებით მოხდა ამ ადამიანების კარვების წართმევა“, - განაცხადა სიხუაშვილმა.

სიხუაშვილის განცხადებით, მოვაჭრეები აპირებენ მთავარ პროკურატურას მიმართონ საჩივრით. მათი მოთხოვნით, უნდა დაისაჯონ ის პოლიციელები, რომლებიც ძალის გამოყენებით წაართვეს კარავი.

მოვაჭრეთა აქცია ამ დრომდე გრძელდება. დაზარალებულები ითხოვენ ერთჯერადი კომპენსაციის სახით 5 000 ლარსა და ალტერნატიული ფართის გამოყოფას, სადაც ვაჭრობას გააგრძელებენ.

შეგახსენებთ, რომ „ბავშვთა სამყაროში“ ხანძარი 30 იანვარს გაჩნდა.

ანა მებურიშვილი