კომენტარი

პრემიერ-მინისტრი მთავრობის დამტკიცების შემდეგ, თავის საგარეო ტურნეს ბრიუსელით იწყებს, რაც კარგად არის აღქმული ბრიუსელში - ნატალი საბანაძე

დღეს იწყება პრემიერ-მინისტრის პირველი ვიზიტი ბრიუსელში, ის ხვდება უმაღლესი დონის წარმომადგენლებს, განსაკუთრებით, ევროკავშირს გავუსვამ ხაზს. პირველი შეხვედრა ექნება პრეზიდენტ ტუსკთან და თავისთავად, ეს ვიზიტი მნიშვნელოვანია იმით, რომ პრემიერ-მინისტრი მთავრობის დამტკიცების შემდეგ ასე ვთქვათ თავის საგარეო ტურნეს ბრიუსელით იწყებს. ეს კარგად არის აღქმული ბრიუსელში, - ამის შესახებ ბელგიის სამეფოსა და ლუქსემბურგის დიდ საჰერცოგოში საქართველოს სრულუფლებიანმა ელჩმა, ევროკავშირთან საქართველოს მისიის ხელმძღვანელმა ნატალი საბანაძემ მთავრობის მეთაურის პირველი სამუშაო ვიზიტის კომენტირებისას განაცხადა.

მამუკა ბახტაძე პრემიერ-მინისტრის რანგში პირველი ვიზიტით ბელგიის სამეფოს დღეს ეწვევა.

„ევროკავშირში ჩვენი პარტნიორების მოლოდინია, რომ ახალი პრემიერ-მინისტრი გააგრძელებს იმ კურსს, რომელიც საქართველოს უკვე დიდი ხანია აქვს აღებული ევროკავშირთან დაახლოების კუთხით. მას ასევე ექნება შეხვედრები იმ პრიორიტეტულ კომისრებთან, რომლებიც მნიშნელოვანია ჩვენთვის ასოცირების ხელშეკრულების შესრულების მხრივ, განსაკუთრებით აღვნიშნავ ვაჭრობის კომისარ სესილია მალმსტრომს, რადგანაც საქართველოს აქვს ევროკავშირთან ვაჭრობის ხელშეკრულება და ზოგადად, ასევე მოლოდინი არის იმისა, რომ პრემიერ-მინისტრი გაუსვამს ხაზს, თუ რამდენად მნიშვნელოვანია ასოცირების ხელშეკრულება, მისი ზედმიწევნით შესრულება და შემდგომი ნაბიჯები საქართველოს ევროკავშირთან დაახლოების კუთხით,“ - განაცხადა ნატალი საბანაძემ.