პოლიტიკა

პრემიერ-მინისტრი ,,ქართული ოცნების“ მეგობრების და ნათესავების ბიუჯეტის ხარჯით დასაქმებაზე აგრძელებს საუბარს

თბილისის საკრებულოს ფრაქცია ერთიანი ნაციონალური მოძრაობის დეპუტატი ირაკლი აბესაძე პრემიერ-მინისტრ გიორგი კვირიკაშვილის განცხადებას ეხმაურება იმასთან დაკავშირებით, რომ არჩევნების შემდეგ სახელმწიფო „შპს“ დაფუძნდება, რომელსაც სოსო ჯაჭვლიანი უხელმძღვანელებს.

ირაკლი აბესაძის თქმით, ხელისუფლების დასაქმების პროგრამა მომავალი ოთხი წლის მანძილზეც საკუთარი მხარდამჭერებისა და ყოფილი პარლამენტარების დასაქმებაზეა გათვლილი და არა ჩვეულებრივ მოსახლეობაზე.

,,როდესაც მოქალაქეები საქართველოს მთავრობის სხდომას დიდი იმედით უყურებენ, რომ შესაძლებელია რაიმე მათ სასარგებლოდ ითქვას, მორიგი იმედგაცრუება იყო პრემიერ-მინისტრ გიორგი კვირიკაშვილის განცხადება, რომელმაც კიდევ ერთხელ ცხადი გახადა, რომ მომდევნო ოთხი წლის განმავლობაში, მთავარი დასაქმების პროგრამა იქნება სახელმწიფო ბიუჯეტის ხარჯზე შეიქმნას ახალი სახელმწიფო შპს-ები და იქ დასაქმდნენ ,,ქართული ოცნების“ აქტივისტები, ყოფილი პარლამენტარები, მაგალითად სოსო ჯაჭვლიანი, რომელსაც არც დეპუტატობისას გამოუჩენია თავი რაიმე სასარგებლოს კეთებით ადამიანებისთვის და ამ ადამიანის ბიუჯეტის ხარჯზე დასასაქმებლად, უნდა შეიქმნას ახალი კომპანიები“, - განაცხადა ირაკლი აბესაძემ.

შეგახსენებთ, მთავრობის დღევანდელ სხდომაზე პრემიერ-მინისტრმა განაცხადა, რომ მთის კურორტების განვითარების კომპანიაში მენეჯმენტის გაძლიერების მიზნით, არჩევნების შემდეგ სახელმწიფო შპს შეიქმნება, რომელსაც სოსო ჯაჭვლიანი უხელმძღვანელებს.

მარი ნამგალაძე