მსოფლიო

პრემიერის არჩევნებთან დაკავშირებით სომხეთის პარლამენტში 1 მაისს საგანგებო სხდომა გაიმართება

სომხეთის ეროვნული კრების თავმჯდომარის, არა ბაბლოიანის განცხადებით, 1 მაისს გაიმართება პარლამენტის საგანგებო სხდომა პრემიერ-მინისტრის არჩევნებთან დაკავშირებით.

პოლიტიკურ ძალებს პრემიერობის კანდიდატების წარდგენა 30 აპრილამდე შეუძლიათ. საპარლამენტო ოპოზიციური ფრაქცია „ელქმა“ უკვე დაასახელა თავის კანდიდატად ქვეყანაში მიმდინარე საპროტესტო აქციების ერთ-ერთი ორგანიზატორი ნიკოლ პაშინიანი.

ცნობისთვის, ქვეყნის ყოფილი პრეზიდენტი სერჟ სარგსიანი, რომელიც 17 აპრილს დაამტკიცეს პრემიერად, 23 აპრილს თანამდებობიდან გადადგა. ეს მოხდა მასშტაბური საპროტესტო აქციების ფონზე, რომლის მონაწილეები სარგსიანის გადადგომასა და პოლიტიკიდან წასვლას ითხოვდნენ.

„სამოქალაქო დაუმორჩილებლობის“ სახელით ცნობილი აქციები დღესაც გრძელდება სომხეთში. პაშინიანის თქმით, დღევანდელი მსვლელობების მთავარი გზავნილია „წესრიგი და კანონიერება“.

ასევე ცნობილი გახდა, რომ სამმა მინისტრმა და ორმა გუბერნატორმა თანამდებობები დატოვეს. 5-ივე მათგანი არის სომხეთის რევოლუციური ფედერაციის „დაშნაკცუტუნის“ წევრი. აღნიშნულმა პარტიამ გუშინ მმართველი კოალიცია დატოვა.