პოლიტიკა

პრეზიდენტის ადმინისტრაციის სურვილი იყო, რომ საპარლამენტო უმრავლესობა ამ ეტაპზევე ჩართულიყო კონსულტაციებში - ფიქრია ჩიხრაძე

პრეზიდენტის პოლიტიკური მრჩეველი, ფიქრია ჩიხრაძე გამოეხმაურა მმარტველი პარტიის გადაწყვეტილებას, უზენაესი სასამართლოს თავმჯდომარის კანდიდატის არჩევასთან დაკავშირებულ კონსულტაციებში აღარ მიიღოს მონაწილეობა.

ჩიხრაძის განცხადებით, პრეზიდენტის ადმინისტრაციის სურვილი იყო, რომ საპარლამენტო უმრავლესობა ამ ეტაპზევე ჩართულიყო უზენაესი სასამართლოს თავმჯდომარის შერჩევასთან დაკავშირებულ კონსულტაციებში. ჩიხრაძემ იმედი გამოთქვა, რომ კანდიდატურის შერჩევის შემდეგ, მმართველი გუნდი პროცესს შესაბამისი მზაობით შეხვდება.

„ჩვენი სურვილი იყო, რომ საპარლამენტო უმრავლესობა ამ ეტაპზევე ჩართულიყო უზენაესი სასამართლოს თავმჯდომარის შერჩევასთან დაკავშირებულ კონსულტაციებში. ყოველი შემთხვევისთვის იმედი გვაქვს, შემდგომ ეტაპზე მაინც, როდესაც კანდიდატურა იქნება შერჩეული, ისინი ამ პროცესს შესაბამისი მზაობით დახვდებიან.

დარჩა კიდევ რამდენიმე ჯგუფი, რომელთან შეხვედრასაც მნიშვნელოვნად მივიჩნევთ და უახლოეს ხანში გადავალთ შემდგომ ეტაპზე, რასაც ჰქვია კანდიდატურების განხილვის ეტაპი",- განაცხადა ჩიხრაძემ.