პოლიტიკა
პრეზიდენტის კომენტარის ხასიათის გამო არ უნდა იცვლებოდეს საკონსტიტუციო მოდელები ქვეყანაში - გიორგი აბაშიშვილი
საქართველოს პრეზიდენტის ადმინისტრაციის უფროსი გიორგი აბაშიშვილი გამოეხმაურა პარლამენტის თავმჯდომარის, ირაკლი კობახიძის განცხადებას, რომლის მიხედვით, პრეზიდენტის არაკორექტული განცხადების გამო შესაძლოა, საკონსტიტუციო კომისიამ პრეზიდენტის არაპირდაპირი არჩევის წესზე იმსჯელოს.
აბაშიშვილის განცხადებით, საკონსტიტუციო ცვლილებები პრეზიდენტის განცხადების საპასუხოდ არ უნდა იცვლებოდეს.
„ მისი [ ირაკლი კობახიძის] თქმით, ქვეყანაში კონსტიტუცია უნდა იცვლებოდეს არა ფუნდამენტურ ანალიზზე დაყრდნობით, არამედ პრეზიდენტის კომენტარების ხასიათიდან გამომდინარე. თუ კომენტარის ხასიათიდან გამომდინარე უნდა იცვლებოდეს ქვეყანაში საკონსტიტუციო მოდელები, მაშინ უფრო ლოგიკური ხომ არ იქნებოდა, საქართველოს კონსტიტუციაში პირდაპირ ჩაგვეწერა ხასიათის გამოვლენის აკრძალვის ვალდებულება საქართველოს პრეზიდენტის, მედიისა და საზოგადოებისთვის”, - განაცხადა აბაშიშვილმა.
შეგახსენებთ, რომ დღეს სახელმწიფო საკონსტიტუციო კომისიის სამუშაო ჯგუფის გაერთიანებულ სხდომაზე პარლამენტის თავმჯდომარემ ირაკლი კობახიძემ პრეზიდენტის გუშინდელი გამოსვლა, როგორც არაკორექტული შეაფასა. კერძოდ, მან ილაპარაკა პრეზიდენტის ნათქვამზე, რომელიც ეხებოდა პრეზიდენტის ორსაფეხურიანი წესით არჩევას. გიორგი მარგველაშვილის თქმით, აღნიშნული საკითხის განხილვის მოტივაცია არის „არა კონსტიტუციის შინაარსობრივი გადახედვა, არამედ ამ კონკრეტულ პოლიტიკოსთან დაკავშირებული შეხედულებები“.
ანა მებურიშვილი