პოლიტიკა
პრეზიდენტისა და მისი ადმინისტრაციის არასერიოზულ განცხადებებზე კომენტარებს აღარ გავაკეთებ - ირაკლი კობახიძე
საქართველოს პარლამენტის თავმჯდომარის, ირაკლი კობახიძის განცხადებით, ის აღარ გამოეხმაურება პრეზიდენტისა და მისი ადმინისტრაციის განცხადებებს, რომლებიც საკონსტიტუციო პროექტზე „კონსესუსს“ ხელს არ უწყობს.
„მე პრეზიდენტის განცხადებებზე აღარ გავაკეთებ კომენტარებს. ხშირად კეთდება ხოლმე სამწუხაროდ, არასერიოზული და დესტრუქციული განცხადებები პრეზიდენტისა და მისი ადმინისტრაციის მხრიდან, რომელიც ნამდვილად ხელს არ უწყობს კონსესუსის ჩამოყალიბებას საკონსტიტუციო ცვლილებების გარშემო. აქედან გამომდინარე, დღეს მე მოვერიდები რაიმე კონკრეტული კომენტარის გაკეთებას", - განაცხადა კობახიძემ.
შეგახსენებთ, რომ პრეზიდენტის ადმინისტრაციის უფროსის, გიორგი აბაშიშვილის განცხადებით, „პარლამენტის თავმჯდომარემ საკონსტიტუციო კომისიის შექმნიდან 6 თვის შემდეგ კიდევ ერთხელ დაადასტურა, რომ საკონსტიტუციო კომისიის საქმიანობის სულისკვეთება რეალურად იყო ანგარიშსწორება ერთ კონკრეტულ პოლიტიკოსზე - პრეზიდენტ მარგველაშვილზე“.
კობახიძემ ასევე აღნიშნა, რომ მიმდინარეობს მუშაობა კონსტიტუციაზე, რომელმაც უნდა გამორიცხოს ყოველგვარი ავტოკრატია და უზრუნველყოს დემოკრატიული პროცესების განვითარება ქვეყანაში.
ანა მებურიშვილი