პოლიტიკა

პრეზიდენტმა სალომე ზურაბიშვილმა მრჩევლები და საკუთარი გუნდის წევრები წარადგინა

საქართველოს პრეზიდენტმა სალომე ზურაბიშვილმა ათონელის პრეზიდენტის სასახლეში მრჩევლები და საკუთარი გუნდის წევრები წარადგინა.

პრეზიდენტის ადმინისტრაციას ლაშა ჟვანია უხელმძღვანელებს.

ადმინისტრაციის უფროსის მოადგილედ დაინიშნა ქეთევან მახარაშვილი, რომელსაც ეთნიკურ უმცირესობებთან დაკავშირებული და გენდერული თანასწორობის საკითხებში პრეზიდენტის საქმიანობის კოორდინაცია დაევალება, ასევე ის დროებით პრესსპიკერის ფუნქციებსაც შეითავსებს.

დიმიტრი გაბუნია დაინიშნა საპარლამენტო მდივნად.

შეზღუდული შესაძლებლობის მქონე პირების საკითხებში პრეზიდენტის მრჩეველი იქნება სიმონ პეტრიცი. მისი წარდგენისას ზურაბიშვილმა განაცხადა, რომ პრეზიდენტის სასახლე არაა ბოლომდე ადაპტირებული შშმ პირებისთვის და „ჩვენ ამ ცვლილებებით დავიწყებთ პრეზიდენტის სასახლიდან“.

დიასპორისა და მოქალაქეობის საკითხებში პრეზიდენტის მრჩეველი ნათია სულავა გახდა, მრჩეველი სამხედრო საკითხებში – აკია ბარბაქაძე, მრჩეველი საზოგადოებასთან და მედიასთან ურთიერთობის საკითხებში - ირინა შენგელია, ხოლო კულტურის, განათლებისა და მეცნიერების საკითხებში - კოტე ნაცვლიშვილი.