საზოგადოება

პროექტი გაგრძელდება იქამდე, სანამ ბოლო პაციენტი არ მიიღებს მკურნალობას - დავით სერგეენკო

ცე ჰეპატიტის ელიმინაციის პროექტი გაგრძელდება იქამდე, სანამ ბოლო პაციენტი არ მიიღებს მკურნალობას, - განუცხადა ჟურნალისტებს ჯანდაცვის მინისტრმა, დავით სერგეენკომ ცე ჰეპატიტის ელიმინაციის პროგრამასთან დაკავშირებით გამართული საერთაშორისო მრჩეველთა ჯგუფის მეორე შეხვედრის ფარგლებში.
,,პროექტი გაგრძელდება იქამდე, სანამ ბოლო პაციენტი არ მიიღებს მკურნალობას. ჩვენ მოგვეცა შესაძლებლობა, რომ ჩართულობის კრიტერიუმი საერთოდ მოგვეხსნა და ნებისმიერს, ვინც გაივლის შესაბამის კვლევებს, მიიღოს ეს მკურნალობა. თუ შარშან შეგვეძლო 700-800 პაციენტის ჩართვა პროექტში თვის განმავლობაში, დღეს უკვე ავედით 5000-ზე და ეს ბოლო არ არის’’, - განაცხადა დავით სეერგეენკომ.

ღონისძიებას ესწრებოდა საქართველოში აშშ-ს ელჩი იან კელი. მისი თქმით, ცე ჰეპატიტის ელიმინაციის პროგრამა არის მნიშვნელოვანი პროექტი, რომელიც ძალიან ბევრ ადამიანს დაეხმარება.

,,მოხარული ვარ, რომ დღევანდელ ღონისძიებაში მივიღე მონაწილეობა. ეს არის ძალიან მნიშვნელოვანი პროექტი, რომელიც ძალიან ბევრ ადამიანს დაეხმარება. ეს არის ამერიკის და საქართველოს მთავრობების თანამშრომლობის შედეგი’’, - განუცხადა ჟურნალისტებს იან კელიმ.

ნინო ექვთიმიშვილი