საზოგადოება

პროკურატურა თაღლითებს მფარველობს - „თავისუფალი საქართველო“

პარტია ,,თავისუფალი საქართველო“ პროკურატურას თაღლითობის ხელშეწყობაში ადანაშაულებს.

კერძოდ, საუბარია ტოტალიზატორ ,,მაქსიმუმზე“, რომელიც როგორც პარტიაში ირწმუნებიან, კეთილსინდისიერად მოგებულ თანხის გაცემაზე უარი რამდენიმე ათეულ პირს უთხრა.

,,2016 წლის 30 ნოემბერს ცოტნე ტაბატაძემ მოიგო თანხა ტოტალიზატორ „მაქსიმუმში“. მიუხედავად იმისა, რომ განმცხადებელმა თანხა მოიგო კეთილსინდისიერად, თამაშის შედეგად და ამ ფაქტის უტყუარობას ადასტურებს ნოტარიუსიც, კომპანიამ არ გადასცა გელა ტაბატაძეს მოგებული თანხა, ხოლო მოგვიანებით საერთოდ მიიმალა. მსგავსი სქემით, კომპანიამ მიითვისა რამდენიმე ათეული პირისთვის გადასაცემი თანხა.

მიუხედავად იმისა, რომ საქმე გვაქვს აშკარა თაღლითობასთან, საგამოძიებო სამსახურმა, კერძოდ, თბილისის მთავარი სამმართველოს პირველი სამმართველოს გამომძიებელმა ლევან ხუხუამ ტაბატაძეს აცნობა, რომ მიწოდებული ინფორმაციისა და დოკუმენტების საფუძველზე არ იკვეთება სისხლის სამართლის კოდექსით გათვალისწინებული კონკრეტული დანაშაულის ნიშნები და შესაბამისად არ არსებობს გამოძიების დაწყების საფუძვლები.

იმ ფონზე, როდესაც მრავალი ადამიანი, ბევრად უფრო ნაკლები მასშტაბის დანაშაულისთვის სასჯელს იხდის საქართველოს ციხეებში, საგამოძიებო უწყების პასუხი წარმოადგენს დამნაშავეთა მფარველობის აშკარა მტკიცებულებას.

„თავისუფალი საქართველო“ მიმართავს მთავარ პროკურატურას დანაშაულის გამოძიების მოთხოვნით. ასევე მივმართავთ საქართველოს პარლამენტის იურიდიულ საკითხთა კომიტეტს, უახლოეს სხდომაზე იმსჯელოს სახელმწიფო უწყებების მხრიდან დამნაშავეთა მფარველობის კონკრეტული ფაქტის შესახებ“, - ნათქვამია ,,თავისუფალი საქართველოს“ განცხადებაში.