უახლესი ამბები
- 23.04.2024 17:34კონტრაქცია ნიშნავს, რომ „ქართული ოცნების“ ბოლო ჟამია - სოფო ჯაფარიძე
- 23.04.2024 17:26კანონზე მსჯელობენ პოლიტიკური პარტიები პარლამენტში და არა ვიღაც გარედან, თუნდაც პარტნიორი, ოპოზიციამ კეთილი უნდა ინებოს და დაამტკიცოს, რომ კანონი არ არის კარგი - ირაკლი კობახიძე
- 23.04.2024 17:21ბიზნესი მხარს უჭერს „ქართულ ოცნებას“, ხელისუფლებას, იქიდან გამომდინარე, რომ ჩვენი უმთავრესი მიღწევა ამ ქვეყანაში არის ბიზნესის რეკეტის ერთხელ და სამუდამოდ დასრულება - ირაკლი კობახიძე
- 23.04.2024 15:47ჩემი აზრით, ის ხალხი, რომელიც ჩამოდის აქციაზე, ყველაზე საცოდავი ხალხია – იაგო ხვიჩია
- 23.04.2024 15:39საქართველოს ბანკის მხარდაჭერით, საქართველოში KIABI – ს პირველი ფილიალი გაიხსნა
- 23.04.2024 10:37ავტომანქანის ყალბი მართვის მოწმობების დამზადება-გასაღების ფაქტზე ოთხი პირი დააკავეს
არქივი
სამართალი
პროკურატურამ ნიკოლოზ კვეზერელს და კიდევ ორ მოქალაქეს უკანონოდ ჩამორთმეული მიწის ნაკვეთები დაუბრუნა
საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტის გადაწყვეტილებით, პოლიტპატიმარ ნიკოლოზ კვეზერელს და კიდევ 2 დაზარალებულ მოქალაქეს უკანონოდ ჩამორთმეული და ამჟამად სახელმწიფო ბალანსზე რიცხული დაახლოებით 800 000 ლარამდე ღირებულების მიწის ნაკვეთები დაუბრუნდებათ.
დეპარტამენტის მიერ გახსნილია ქონების უკანონოდ ჩამორთმევის მორიგი ფაქტები. კერძოდ, ჩატარებული გამოძიებით დადგენილია, რომ 2010 წლის 07 აგვისტოს, ბიზნესმენი ნიკოლოზ კვეზერელი დაკავებულ იქნა კონსტიტუციური უსაფრთხოების დეპარტამენტის თანამშრომლების მიერ, უცხო ქვეყნის მოქალაქის ფულადი თანხების თაღლითურად დაუფლების გამო.
თბილისის საქალაქო სასამართლოს 2011 წლის 27 აპრილის განაჩენით ნიკოლოზ კვეზერელი ცნობილ იქნა დამნაშავედ წარდგენილ ბრალდებაში და სასჯელის სახით შეეფარდა თავისუფლების აღკვეთა 11 წლის ვადით.
განაჩენის გამოტანის შემდეგ, მთავარი პროკურატურის წარმომადგენელმა ნიკოლოზ კვეზერელს საპატიმრო დაწესებულებაში შეუთვალა და გადასცა კატეგორიული მოთხოვნა, რომ თუ მას სურდა საპროცესო შეთანხმების გაფორმება და მისჯილი წლების ჩამოკლება, ამისთვის მას სახელმწიფოს სასარგებლოდ უნდა დაეთმო დაბა გუდაურში მდებარე 28 000 კვ.მ. მიწის ნაკვეთი, რომელიც ბიზნესმენის კანონიერ მფლობელობასა და საკუთრებაში იმყოფებოდა და არანაირი კავშირი მის საქმესთან არ ჰქონდა.
პროკურატურის მხრიდან განხორციელებული ფსიქოლოგიური ზეწოლის შედეგად, კვეზერელმა ხსენებული მიწის ნაკვეთი უსასყიდლოდ, ციხეში შედგენილი მინდობილობის საფუძველზე გადასცა სახელმწიფოს, რის შემდეგაც მასთან გაფორმდა საპროცესო შეთანხმება და ნაცვლად 11 წლისა, მიესაჯა 5 წლით თავისუფლების აღკვეთა. 2012 წლის 05 დეკემბერის საქართველოს პარლამენტის დადგენილებით ნიკოლოზ კვეზერელი აღიარებულ იქნა პოლიტპატიმრად და გათავისუფლდა საპატიმროდან.
2006 სექტემბერში, „სახელმწიფო საკუთრებაში არსებული სასოფლო-სამეურნეო დანიშნულების მიწის პრივატიზების შესახებ“ საქართველოს კანონის საფუძველზე, მოქალაქეებს შახი ლატარიას და ვახტანგ გოგიბერიძეს საკუთრებაში გადაეცათ ქ. წალენჯიხაში მდებარე მიწის ნაკვეთები, კერძოდ შახი ლატარიას 10 ჰა მიწის ნაკვეთი, ხოლო ვახტანგ გოგიბერიძეს 5 ჰა მიწის ნაკვეთი.
მოგვიანებით ხსენებული ქონება წალენჯიხის მუნიციპალიტეტის გამგეობის ინტერესის ქვეშ აღმოჩნდა, რა მიზნით წალენჯიხის გამგებლის მოვალეობის შემსრულებელმა გია მებონიამ თავისთან გამგეობაში დაიბარა მოქალაქეები შახი ლატარია და ვახტანგ გოგიბერიძე, რომელთაც კატეგორიულად მოსთხოვა მათ საკუთრებაში არსებული ნაკვეთების სახელმწიფოსთვის უსასყიდლოდ გადაცემა. მათი მხრიდან წინააღმდეგობის გაწევის შემთხვევაში კი დაემუქრა, რომ მიწის ნაკვეთებს მაინც წაართმევდნენ და შესაძლოა მათი სისხლისსამართლებრივ პასუხისგებაში მიცემაც მომხდარიყო, რასთან დაკავშირებითაც საქმის კურსში იყო სამეგრელო-ზემო სვანეთის პროკურატურა.
განხორციელებული ფსიქოლოგიური ზეწოლის შედეგად დაზარალებულმა მოქალაქეებმა სახელმწიფოს სახელზე უსასყიდლოდ გადააფორმეს მათ საკუთრებაში არსებული სოფელ წალენჯიხაში არსებული მიწის ნაკვეთები.
ჩვენს მიერ მიღებული შემაჯამებელი გადაწყვეტილების საფუძველზე პროკურატურა შუამდგომლობით მიმართავს საქართველოს ეკონომიკისა და მდგრადი განვითარების სამინისტროს, რათა საქართველოს მთავრობის განკარგულებით, ხსენებულ დაზარალებულ მოქალაქეებს დაუბრუნდეთ ამჟამად სახელმწიფო ბალანსზე რიცხული მათი კუთვნილი ქონება: ნიკოლოზ კვეზერელს - დაბა გუდაურში მდებარე 2,8 ჰა კვ.მ მიწის ნაკვეთი, შახი ლატარიას - ქ.წალენჯიხაში მდებარე 10 ჰა მიწის ნაკვეთი, ხოლო ვახტანგ გოგიბერიძეს - ასევე ქ.წალენჯიხაში მდებარე 5 ჰა მიწის ნაკვეთი.
რაც შეეხება ქონების უკანონოდ ჩამორთმევაში მხილებულ ყოფილ საჯარო მოხელეებს, წალენჯიხის მუნიციპალიტეტის გამგებლის მოვალეობის ყოფილი შემსრულებლის გია მებონიას მიმართ შეწყდა გამოძიება მისი გარდაცვალების გამო, ხოლო რაც შეეხება პროკურატურის ყოფილ თანამშრომელს, გამოძიებასთან თანამშრომლობის ხარისხის გათვალისწინებით, პროკურატურა იმსჯელებს მის მიმართ დისკრეციული უფლებამოსილების გამოყენების მიზანშეწონილობის საკითხზე.