მსოფლიო

პუტინს სურს ომის შეჩერება - ტრამპი

აშშ-ის ყოფილი პრეზიდენტი დონალდ ტრამპი აცხადებს, რომ რუსეთის პრეზიდენტ ვლადიმირ პუტინს „სურს ბრძოლების შეჩერება“ და უარყოფს ვარაუდს, რომ მისი ამბიციები უკრაინის საზღვრებს სცდება.

„მე ვფიქრობ, რომ მას სურს შეჩერება. ასე ვხედავ. ჩვენ ამაზე დიდი ხნის განმავლობაში ვისაუბრეთ. [ახლო აღმოსავლეთის წარმომადგენელი] სტივ ვიტკოფი მასთან სამი საათის განმავლობაში იმყოფებოდა. ვფიქრობ, პუტინს სურს ბრძოლის შეჩერება,“ — განაცხადა ტრამპმა ჟურნალისტებთან საუბრისას.

ტრამპის თქმით, რუსეთს „დიდი და ძლიერი მანქანა“ აქვს და ისტორიულად ომებში გამარჯვებას აღწევდა.

„მათ დაამარცხეს ჰიტლერი, დაამარცხეს ნაპოლეონი. დიდი ხანია იბრძვიან და ეს არ არის ახალი,“ — აღნიშნა მან.

ტრამპის ეს განცხადება იმ ფონზე გაკეთდა, როდესაც მისი ადმინისტრაცია რუსეთ-უკრაინის ომის დასრულების გზებს ეძებს.

ჟურნალისტების კითხვაზე, სურს თუ არა პუტინს მთლიანად უკრაინის დაპყრობა, ტრამპმა აღნიშნა, რომ თავად დაუსვა ეს კითხვა პუტინს. „ვფიქრობ, რომ მას სურს გაჩერება. ეს იყო ჩემი კითხვა მის მიმართ. რადგან თუ მას სურდა გაგრძელება, ეს დიდი პრობლემა იქნებოდა ჩვენთვის,“ — განაცხადა ტრამპმა.

უკრაინის პრეზიდენტმა ვოლოდიმირ ზელენსკიმ NBC News-ისთვის მიცემულ ინტერვიუში აღნიშნა, რომ მან ტრამპს ურჩია, არ ენდოს პუტინს, რადგან „ის მატყუარაა“.

ზელენსკიმ ასევე გააფრთხილა, რომ პუტინს შესაძლოა, ნატოს წინააღმდეგ ომის დაწყება სურდეს და რომ რუსეთი ბელარუსის ტერიტორიაზე დიდი რაოდენობით ჯარის განლაგებას გეგმავს.

ამ შეფასებას ტრამპი არ დაეთანხმა: „არა, არ ვეთანხმები. არც ერთ წამს.“