საზოგადოება
ქართულ და რუსულ ეკლესიებს შორის ურთიერთობას უნდა ვუწოდოთ მაგალითი ორი ქვეყნის პოლიტიკოსებისთვის - ილია მეორე
საქართველოს კათალიკოს პატრიარქი, ილია მეორე მოსკოვში რუსეთის მართლმადიდებლური ეკლესიის წინამძღვარს, კირილს შეხვდა.
ილია მეორე რუსეთის დედაქალაქში პატრიარქ კირილის 70 წლის იუბილესთან დაკავშირებით იმყოფება.
როგორც რუსული სააგენტო ,,რია ნოვოსტი’’ წერს, საქართველოს პატრიარქმა შეხვედრაზე ორ ქვეყნის ეკლესიების ურთიერთობის მნიშვნელობაზე გაამახვილა ყურადღება.
,,ქართულ და რუსულ მართლმადიდებლურ ეკლესიებს შორის ურთიერთობას შეგვიძლია ვუწოდოთ მაგალითი ორი ქვეყნის პოლიტიკოსებისთვის. ამ ურთიერთქმედების შედეგი არის მომლოცველებისა და დამსვენებლების რაოდენობის ზრდა რუსეთიდან’’, - განაცხადა საქართველოს პატრიარქმა პატრიარქ კირილთან შეხვედრაზე.
მისი თქმით, ორ ეკლესიას შორის ურთიერთობას აქვს უდიდესი მნიშვნელობა ორი სახელმწიფოსა და მათი ხალხებისათვის.
,,ჩვენ ვაძლევთ მაგალითს ჩვენ პოლიტიკოსებს ჩვენ ქვეყნებს შორის ურთიერთქმედების თვალსაზრისით. უნდა აღვნიშნო, რომ არასდროს უკანასკნელი წლების განმავლობაში არ გვყოლია რუსეთიდან ამდენი დამსვენებელი, როგორც წელს და ჩვენ ეს ძალიან გვახარებს’’, - თქვა ილია მეორემ და აქვე აღნიშნა, რომ ორივე ეკლესიამ ყველაფერი უნდა გააკეთოს იმისთვის, რომ რუსეთ-საქართველოს პოლიტიკურ წრეებს შორის ურთიერთობა გაუმჯობესდეს.
,,ვფქირობ, ჩვენ ამას შევძლებთ’’, - დასძინა ილია მეორემ.
თავის მხრივ, რუსეთის ეკლესიის მეთაურმა ქართულ და რუსულ ეკლესიებს შორის ურთიერთობა შეაფასა როგორც ,,გულების დონეზე კავშირი,’’ რომლის გარეშეც მისი თქმით, ორი ქვეყნის ხალხებს შორის კეთილშობილური ურთიერთობა წარმოუდგენელია.
ნინო ექვთიმიშვილი