საზოგადოება

„ქართული მარში“ შიმშილობის დაწყებას გეგმავს

„ქართული მარში“ 30 აპრილს შიმშილობას დაიწყებს. ამის შესახებ დღეს გამართულ ბრიფინგზე „ქართული მარშის“ ერთ-ერთმა წევრმა სანდრო ბრეგაძემ განაცხადა.

სანდრო ბრეგაძე 19 მარტს, „რუსთავი 2“-თან განვითარებული მოვლენების შედეგად დაკავებული 7 პირის გათავისუფლებას და იმ პოლიტიკური პირების პასუხისმგებლობას მოითხოვს, რომლებმაც მისი თქმით, „მარშის“ წევრების დაკავება დაგეგმეს.

აქციის ჩატარება სამ ლოკაციაზე იგეგმება - სახელმწიფო კანცელარიასთან, შსს-ს შენობის წინ და მთავარ პროკურატურასთან.

„შვიდმა პოლიტიკურმა პატიმარმა გამოგვიგზავნა წერილი, სადაც წერია, რომ 30 აპრილს, გლდანის მე-8 სასჯელაღსრულების დაწესებულებაში დაიწყებენ შიმშილს. შიმშილობას შეუერთდებიან ციხის გარეთაც. ეს არ იქნება დიეტის მსგავსი შიმშილობა, არამედ ეს იქნებასასიკვდილო შიმშილობა, როგორც 1981 წელს ირლანდიაში. შიმშილობა დაიწყება სახელმწიფო კანცელარიასთან, ასევე დაკავებულთა დედები იშიმშილებენ შს სამინისტროსთან და შიმშილობა იქნება ასევე მთავარ პროკურატურასთან. მოვითხოვთ, გათავისუფლდნენ პოლიტპატიმრები და დაისაჯონ ის პირები, ვინც ახორციელებენპოლიტიკურ ტერორს და შერჩევით სამართალს. თუ ომი უნდათ, ომს მიიღებენ“, - განაცხადა სანდრო ბრეგაძემ.

ბრეგაძემ აღნიშნა, რომ „ქართული ოცნება“ „ქართული მარშის“ წევრებზე ზეწოლას გეგმავს. თამარ ჩუგოშვილი, მამუკა მდინარაძე და ვანო ზარდიაშვილი, ასევე გიგა ბოკერია „ევროპული საქართველოდან“ კი ამ ზეწოლის შემსრულებლები არიან.

შეგახსენებთ, რომ „ქართული მარშის“ წევრები პოლიციამ სამაუწყებლო კომპანია "რუსთავი 2"-თან 19 მარტს დააკავა. ისინი გიორგი გაბუნიას მიერ ეთერში გაკეთებულ რეპლიკას აპროტესტებდნენ.