საზოგადოება

ქართველი ოლიმპიელები საქართელოში დაბრუნდნენ

ქართველი ოლიმპიელები ბრაზილიიდან სამშობლოში დაბრუნდნენ.

მათ თბილისის საერთაშორისო აეროპორტში გულშემატკივრებმა საზეიმო დახვედრა მოუწყვეს. იყო მილოცვები და ემოციური მიმართვები.

როგორც ჟურნალისტებთან საუბარში ოლიმპიურმა ჩემპიონმა ვლადიმერ ხინჩეგაშვილმა განაცხადა, მან სპორტულ კარიერაში მიზანს მიაღწია.

„ძალიან გახარებული ვარ. ჩემს სპორტულ კარიერაში ჩემს მიზანს მივაღწიე და კმაყოფილი და გახარებული ვარ. ამ ხალხმა ორმაგად გამახარა იმიტომ, რომ ამაზე მეტი ბედნიერება რა შეიძლება იყოს, რომ ამხელა ქვეყანას ახარებ“,-განაცხადა სპორტსმენმა.

ოქროს მედალოსან ლაშა ტალახაძის თქმით კი, მან გამარჯვების ემოცია სრულყოფილად მხოლოდ სამშობლოში ჩამოსვლის შემდეგ იგრძნო.

„ემოცია პირადად ჩემში ახლა უფრო იგრძნობა. მაშინ, ამ ყველაფერს ვერ განვიცდიდი. ახლა მივხვდი, თუ რა გავაკეთეთ ქართველმა სპორტსმენებმა ჩვენი ქვეყნისთვის და ამ ადამიანებისთვის“,-განაცხადა ტალახაძემ.

მედიასთან საუბარში სპორტისა და ახალგაზრდობის საქმეთა მინისტრმა ტარიელ ხეჩიკაშვილმა განაცხადა, რომ მას ასეთი არნახული მხარდაჭერა და გულშემატკივრობა დიდი ხანია არ უნახავას.

„ამისთვის განსაკუთრებული მადლობა ჩვენს გულშემატკივრებს. დარწმუნებული ვარ, ერთობლივი თანამშრომლობით, თანადგომით ჩვენ შევძლებთ, რომ არაერთხელ გავახაროთ ჩვენი გულშემატკივარი“,-განაცხადა მინისტრმა.

შეგახსენებთ, რომ ზაფხულის XXXI ოლიმპიურ თამაშებში, რომელიც რიო დე ჟანეიროში 5 -21 აგვისტოს ჩათვლით მიმდინარეობდა, ქართველმა სპორტსმენებმა ორი ოქროს, ერთი ვერცხლისა და ოთხი ბრიჯნაოს მედლის მოპოვება შეძლეს.

მონიკა დავლიანიძე