საზოგადოება

ქიქოძის ქუჩაზე ხანძრის შედეგად საცხოვრებელი სახლი დაიწვა

თბილისში, ქიქოძის 6 ნომერში საცხოვრებელი სახლი დაიწვა.

ცეცხლი გვიან ღამით შენობის მეოთხე სართულზე, სხვენში გაჩნდა და მესამე სართულზეც გავრცელდა, რის შედეგადაც ნაწილობრივ დაიწვა იქ მდებარე რამდენიმე ბინა.

ხანძარის ლიკვიდაცია გამთენიისას მოხერხდა.

შსს-ს საგანგებო სიტუაციების მართვის სააგენტოს თბილისის სამმართველოს უფროსის მოადგილის დავით გელაშვილის განცხადებით, შემთხვევის შედეგად არავინ დაშავებულა.

„სამსართულიანი შენობის მე-3 სართული ნაწილობრივ და სასხვენო გადახურვა იწვოდა. საერთო ფართი 200-250 კვადრატული მეტრია. ადგილზე თბილისის მთავარი სამმართველოს 13 ერთეული სახანძრო-სამაშველო ტექნიკა მუშაობდა. ხანძრის შედეგად არავინ დაშავებულა“, - განაცხადა დავით გელაშვილმა.

წინასწარი ინფორმაციით, ხანძრის მიზეზად ელექტროსადენები სახელდება.

ნინო ექვთიმიშვილი