საზოგადოება

ქუთაისის აეროპორტში პირველი რეისი შესრულდა ვროცლავი -ქუთაისის მიმართულებით

დღეს , 11:05 საათზე ქუთაისის დავით აღმაშენებლის სახელობის აეროპორტში უნგრულმა დაბალბიუჯეტიანმა ავიაკომპანიამ Wizz air-მა პირველი რეგულარული რეისი შეასრულა ვროცლავი-ქუთაისის მიმართულებით.

თვითმფრინავში მყოფი 167 მგზავრიდან უმრავლესობა პოლონეთის მოქალაქეები იყვნენ. მგზავრები საზღვარზე ქართული ღვინოებით დასაჩუქრდნენ.

2018 წელს პირველი ახალი მიმართულება - რიგა-ქუთაისი, 25 მარტს შესრულდა.

შპს ,,საქართველოს აეროპორტების გაერთიანების“ დირექტორის, ქეთი ალექსიძის განცხადებით, უწყება კომპანია Wizz air-თან მუდმივად გადის კონსულტაციებს ახალი მიმართულებების დამატებაზე.

მისივე თქმით, მაისში კიდევ რამდენიმე მიმართულება დაემატება.

,,ჩვენსა და ავიაკომპანია Wizz air-ს შორის წარმატებული თანამშრომლობის შედეგად. 2018 წელს ქუთაისის საერთაშორისო აეროპორტიდან ევროპის 8 ახალი მიმართულება დაემატა. პირველი რეისი ქუთაისში ერთი კვირის წინ უკვე შესრულდა. დღეს კი მეორე – ულამაზესი ვროცლავის მიმართულება დაემატა. მაისიდან დაემატება ევროპის ყველაზე მოთხოვნადი ქალაქებიც. სასიხარულოა, რომ ბილეთები დაანონსებისთანავე თითქმის სულ გაიყიდა, რაც იმას ნიშნავს, რომ მოთხოვნა ამ მიმართულებებზე მართლაც დიდია და ინტერესი ჩვენი ქვეყნის მიმართ გაზრდილია“, - განაცხადა ალექსიძემ.

17 მაისიდან ქუთაისის დავით აღმაშენებლის საერთაშორისო აეროპორტში ავიაკომპანია Wizz air-ის მეორე ბაზირებული საჰაერო ხომალდი დადგება, რომელიც რეგულარულ რეისებს ათენის, პარიზის, რომის, ბარსელონასა და პრაღის მიმართულებით შეასრულებს.