კონფლიქტის ზონა
ქუტაშვილი და პავლიაშვილი თავიანთ სახლებში იმყოფებიან მშობლებთან ერთად, ოღონდ ოკუპირებულ ტერიტორიაზე - ახალგორის გამგებელი
ახალგორის გამგებლის, ნუგზარ თინიკაშვილის ინფორმაციით, საოკუპაციო ძალების მიერ დაკავებული ლევან ქუტაშვილი და იოსებ პავლიაშვილი საკუთარ სახლებში იმყოფებიან ცხინვალის რეგიონში, თუმცა მათ თბილისის მიერ კონტროლირებად ტერიტორიაზე გადმოსვლის საშუალებას არ აძლევენ.
„ნამდვილად ვიცი, რომ ისინი ჯანმრთელად არიან, თავიანთ სახლებში იმყოფებიან მშობლებთან ერთად, ოღონდ ოკუპირებულ ტერიტორიაზე. როდის გადმოვლენ, ამას ნამდვილად ვერ გეტყვით. როგორც ოსური მხარე აცხადებს, მიმდინარეობს გამოძიება ტერორიზმის ბრალდებით ამ პირების მიმართ და ვიდრე გამოძიება არ დამთავრდება, არ აძლევენ გადმოსვლის საშუალებას.
რა თქმა უნდა, ამ ადამიანების მხრიდან არანაირი ტერორიზმის მცდელობა, სურვილი და გაფიქრებაც კი არ ყოფილა. ეს არის მოგონილი. ისინი დაკავებულები არ არიან, თუმცა არიან თავიანთ სახლებში მეთვალყურეობის ქვეშ, დოკუმენტების გარეშე და ოკუპირებული ტერიტორიების დატოვების საშუალებას არ აძლევენ. არც ტელეფონით სარგებლობის უფლება აქვთ და ვერ ხორციელდება მათთან კონტაქტი. თუმცა ნათესავების მეშვეობით ვიცით, რომ კარგად არიან“, - განაცხადა გამგებელმა.
საოკუპაციო ძალებმა ქუტაშვილი და პავლიაშვილი არჩილ ტატუნაშვილთან ერთად 22 თებერვალს დააკავეს. მომდევნო დღეს ოსურ მედიაში გავრცელდა ინფორმაცია ოკუპირებული ცხინვალის რეგიონში ტატუნაშვილის დაღუპვის შესახებ.
ანა მებურიშვილი