საზოგადოება

რ2-ისთვის დავდე ყველაფერი, რაც შემეძლო და არ შემეძლო - ნიკა გვარამია

ტელეკომპანია რუსთავი2-ის გენერალური დირექტორი ნიკა გვარამია, გუშინ გაკეთებულ განცხადებას განმარტავს, რომელიც არხის თანამშრომლებისთვის ტელეკომპანია „საქართველოს“ გადაცემას შეეხებოდა.

როგორც გვარამიამ Facebook-ში პირად გვერდზე დაწერა, გუშინდელ ინიციატივაში უსასყიდლო გადმოცემაზე საუბარი არ ყოფილა.

„ერთადერთ და უკანასკნელ განცხადებას გავაკეთებ ამ თემაზე. რ2-ისთვის დავდე ყველაფერი, რაც შემეძლო და არ შემეძლო. მეც და გუნდმაც. ვინმესთვის რამის ახევა მდომოდა, ისე გავაკეთებდი, ვერავინ ვერც გაიგებდა და ვერც შემეწინააღმდეგებოდა .ივანიშვილთან თანამშრომლობა მდომოდა, ისე ავიღებდი ჯერ 5 და მერე გაზრდილ 10 მილიონიან "სტავკას" და უბრალოდ გავიწეოდი გვერდზე, საყვედურსაც ვერავინ მეტყოდა - უბრალოდ "დავიღლებოდი" და წავიდოდი ოჯახთან საზღვარგარეთ. ბოლო შემოთავაზებით, გაკოტრების განცხადებას შევიტანდი (რაც ამ წუთამდე უპრობლემოდ შემიძლია) და საჯარო აუქციონზე "ვინც საჭირო იყო, ის იყიდდა" რ2-ს, მე კი ჩემსას მივიღებდი. უმარტივესი გასაკეთებელი იყო ესეც.

ახლა ვერ ვისაუბრებ დეტალებზე და სრულ კონტექსტზე (ოდესმე ითქმება, ალბათ), მთავარს ვიტყვი მხოლოდ - სიტუაცია იმგვარია, რომ დამოუკიდებელი რ2 მხოლოდ ჩვენს მიერ შეთავაზებული ფორმით შეიძლება შენარჩუნდეს - კოლექტივის ხელში. თან იმგვარი კონსტრუქციით, რომ ვერც ბიძინას (პირველ რიგში) მიეყიდოს და ვერც სხვას, თუ ყველა ამაზე არ შევთანხმდით (რისი ალბათობაც ნულოვანია). რაც შეეხება აშკარად მესიჯბოქსურ "ქარხნები მუშებს" - ჩვენ უსასყიდლო გადმოცემაზე არ გვისაუბრია. უბრალოდ, ამ დეტალების განცხადებაში გამოტანა არ ჩავთვალეთ საჭიროდ. გმადლობთ, რომ გვიყურებთ“,-დაწერა გვარამიამ.

გუშინ, ძმებმა ყარამანიშვილებმა რუსთავი2-ის კოლექტივს არხის 40%-ანი წილის გადაცემის ინიციატივთ გამოვიდნენ.

თუმცა, როგორც ნიკა გვარამიამ ბრიფინგზე საპასუხოდ განაცხადა, ამჟამად, ყადაღის ქვეშ მყოფი 40%-იანი წილის გადმოცემა განუხორციელებელია, რადგან წილების გადაცემას ესაჭიროება ყველა მეწილის, მათ შორის, 9%-ის წილის მფლობელის ნინო ნიჟარაძის თანხმობა.

ნიკა გვარამია ძმებ ყარამანიშვილებს შემხვედრი ინიციატივით მიმართა, რომ რუსთავი2-ის თანამშრომლებს საკუთრებაში ტელეკომპანია „საქართველო“ გადაეცეთ, რომლის მფლობელიც ძმები ყარამანიშვილები არიან.

მონიკა დავლიანიძ