უახლესი ამბები
- 19.04.2024 17:25ქოცებო, თქვე ნაცებო შეწყვიტეთ ეს მორიგი უსუსური გადაწყვეტილება, რომელიც 26 ოქტომბერს საპარლამენტო არჩევნებში თქვენი მარცხის შიშს ეფუძნება - „გახარია საქართველოსთვის“
- 19.04.2024 17:15ნარკოტიკული საშუალებების გასაღებასა და უკანონო შემოსავლის ლეგალიზაციაში 3 ბრალდებულს უვადო, ხოლო 2 ბრალდებულს 19 და 18 წლით თავისუფლების აღკვეთა მიესაჯათ
არქივი
საზოგადოება
რა შემთხვევაში დაჯარიმდებიან მოქალაქეები ხმაურისთვის - საპატრულო პოლიციაში განმარტება გაკეთდა
საპატრულო პოლიციის დეპარტამენტში ხმაურისა და პიროტექნიკის გამოყენებისას ჯარიმების ამოქმედების შესახებ განმარტებები გაკეთდა.
ჟურნალისტებს საპატრულო პოლიციის დეპარტამენტის თბილისის მთავარი სამმართველოს უფროსის მოადგილე გრიგოლ შამგორიშვილი ესაუბრა.
მისი თქმით, დღეიდან ძალაში შედის ადმინისტრაციულ სამართალდარღვევათა შესაბამისი მუხლები, რომლებიც ეხება დღისა და ღამის საათებში აკუსტიკური ხმაურის დადგენილი ნორმების გადამეტებას და ასევე პიროტექნიკური ნაკეთობების გამოყენებას.
როგორც შამგორიშვილმა აღნიშნა, ხმაურმზომის სპეციალური აპარატურით საპატრულო პოლიციის ეკიპაჟები იქნებიან აღჭურვილი.
,,შესაბამისად, გამოძახების შემთხვევაში მიიტანენ ადგილზე და მოხდება ადგილზე ხმაურია გაზომვა. დაფიქსირდება არის თუ არა სამართალდარღვევა. პირველი შემთხვევა აკუსტიკური ხმაურის შემთხვევაში გაფრთხილებაა, ეს ეხება როგორც ფიზიკურ, ასევე იურიდიულ პირს. ერთი წლის განმავლობაში გამეორების შემთხვევაში აღნიშნული სამართალდარღვევის ჩადენა უკვე ითვალისწინებს სანქციებს ფიზიკური პირისთვის 150 ლარის ოდენობით, ხოლო იურიდიული პირისთვის 500 ლარიან ჯარიმას. ამ სამართალდარღვევისთვის სახდელდადებული პირი თუ აღნიშნულ ქმედებას გაიმეორებს სახდელდადების პერიოდში, უკვე საჯარიმო სანქციები გაორმაგდება და შესაბამისად 300 ლარიანი და 1000 ლარიანი საჯარიმო სანქცია გახდება", - განაცხადა შამგორიშვილმა.
მისივე განმარტებით, ღამის საათებში პიროტექნიკის გამოყენება ცალსახად აკრძალულია.
"პირველ შემთხვევაში ფიზიკური 150 ლარიანი სანქციით, ხოლო იურიდიული პირი 500 ლარით დაჯარიმდება. გამეორების შემთხვევაში კი, ჯარიმა ორმაგდება. პიროტექნიკის გამოყენების დროს გაფრთხილება არ იქნება. თუმცა პიროტექნიკის გამოყენება კანონით არის დადგენილი და მისი გამოყენება არ იზღუდება 31 დეკემბრიდან 2 იანვრის ჩათვლით, 13 იანვრიდან 14 იანვრის ჩათვლით, ასევე 9 აპრილსა და 26 მაისს. ხმაურის შემთხვევაში მოქალაქემ 112 უნდა დარეკოს", - განაცხადა შამგორიშვილმა.
მისივე თქმით, ისეთი ხმაური, როგორიც არის საავტომობილო, სარკინიგზო, საჰაერო და საზღვაო ინფრასტრუქტურით გამოწვეული ხმაური არ ითვლება სამართალდარღვევად. აგრეთვე არ ითვლება სამართალდარღვევად კონსტიტუციის 25-მუხლის განხორციელება, რომელიც ეხება სიტყვისა და აზრის გამოხატვის თავისუფლებას. შეკრებისა და მანიფესტაციების დროს წარმოქმნილი ხმაურიც არ ითვლება სამართალდარღვევად.
გარდა ამისა, სამართალდარღვევად არ ითვლება დღის განმავლობაში სამშენებლო და სარემონტო სამუშაოების ხმაური. ასევე ნებისმიერი მიმდინარე სპორტული და კულტურული ღონისძიებები, რომელიც თვითმმართველი ერთეულის სანქციით და ნებართვით მიმდინარეობს.