მსოფლიო

რა შესთავაზა სეულმა ფხენიანს? - მსოფლიო მედიისთვის ჩრდილოეთ და სამხრეთ კორეის დელეგაციების შეხვედრის დეტალები გახდა ცნობილი

ბოლო 2 წლის განმავლობაში სამხრეთ და ჩრდილოეთ კორეას შორის პირველი მაღალი დონის შეხვედრა გაიმართა. მოლაპარაკებები დემილიტარიზებულ ზონაში, ე.წ. „მშვიდობიან სოფელ“ პანმუნჯომში მიმდინარეობდა.

შეხვედრის შემდეგ გაირკვა, რომ ჩრდილოეთ კორეა 2018 წლის ზამთრის ოლიმპიადაზე თავისი სპორტსმენებისა და ჩინოვნიკების დელეგაციას, ასევე მხარდამჭერთა გუნდს გააგზავნის. მსოფლიო დონის სპორტული ღონისძიება სამხრეთკორეულ ქალაქ ფხენჩხანში თებერვალში გაიმართება.

სამხრეთ კორეის გაერთიანების მინისტრის მოადგილის, ჩუნ ხე სუნის ინფორმაციით, სეულმა ფხენიანს ასევე შესთავაზა კორეის ომით გაყოფილი ოჯახების წევრების შეხვედრის ჩატარება მთვარის ახალი წლის დღესასწაულზე, რომელიც ოლიმპიადის შუა პერიოდს ემთხვევა.

გარდა ამისა, სამხრეთ კორეის დელეგაცია გამოვიდა ინიციატივით, რომ კორეის ორივე მხარის სპორტსმენები ერთად გამოვიდნენ ოლიმპიადის გახსნის ცერემონიალზე, როგორც ეს მოხდა 2006 წლის ზამთრის ოლიმპიადაზე ტურინში.

სეულმა ასევე შესთავაზა მოლაპარაკებების განახლება სამხედრო საკითხებსა და ფხენიანის ბირთვულ პროგრამაზე.

სამხრეთკორეულმა მხარემ განუცხადა ჩრდილოეთის დელეგაციას, რომ ოლიმპიადის განმავლობაში სანქციების მოხსნის საკითხს გადახედავს.

ჯერჯერობით ჩრდილოეთ კორეის პასუხი ამ შემოთავაზებებზე უცნობია.

ანა მებურიშვილი