კონფლიქტის ზონა
რა თქმა უნდა, ჩვენ ტრამპივით არ ავაშენებთ კედლებს, მაგრამ გავაგრძელებთ ჩვენი სახელმწიფო საზღვრის მოწყობას - ანატოლი ბიბილოვი
ოკუპირებული სამხრეთ ოსეთის დე-ფაქტო პრეზიდენტის, ანატოლი ბიბილოვის განცხადებით, საქართველოსთან არანაირ ურთოერთობაზე საუბარი არ შეიძლება იყოს, სანამ თბილისი ცხინვალის დამოუკიდებლობას არ აღიარებს. ამის შესახებ ბიბილოვმა წლის შემაჯამებელ პრესკონფერენციაზე განაცხადა.
„ჩვენ არაერთხელ განვაცხადეთ, რომ, სანამ საქართველო არ აღიარებს ჩვენს დამოუკიდებლობას და ბოდიშს არ მოიხდის ჩვენი ხალხის მიმართ ჩადენილი დანაშაულისთვის, არანაირ ურთიერთობას ადგილი არ ექნება. მინდა, აღვნიშნო , რომ ქართულმა მხარემ ბოლო დროს მოუხშირა სამხრეთ ოსეთის საზღვართან, ხოლო საქართველოს მოქალაქეები იქცევიან არცთუ ისე კარგი კუთხით სხვადასხვა სახის პროვოკაციული აქციის ჩატარებით“, - განაცხადა ბიბილოვმა .
გარდა ამისა, ბიბილოვმა აღნიშნა, რომ ე.წ. რესპუბლიკა ცხოვრობს „მეზობელი“ საქართველოსგან სიურპრიზის მოლოდინში, რადგან ცხინვალმა არ იცის, „რა მოუვა თავში მორიგ სააკაშვილს“.
„არ ვიცით, მორიგ ჯერზე რა მოუვა თავში მორიგ სააკაშვილს. საქართველოს პოლიტიკა არალოგიკურია, რასაც ადასტურებს ის, რომ საქართველოს არ შეუძლია რუსეთთან მეგობრობა, რომელმაც გადაარჩინა ის თურქეთისგან, სპარსეთისგან. რუსეთის იმპერიის შემადგენლობაში საქართველომ თავისი სახელმწიფოებრიობა შეიძინა“, - განაცხადა ბიბილოვმა.
მან ასევე ხაზი გაუსვა რუსეთთან დადებულ ხელშეკრულებას, რომლის თანახმად, ერთ-ერთ მხარეზე თავდასხმა ავტომატურად ნიშნავს მეორეზე თავდასხმას.
„გასაგებია, რომ საქართველოში არ აპირებენ, შეეგუონ არსებულ პოლიტიკურ სინამდვილეს. სხვა მხრივ, გვაქვს შეთანხმება რუსეთთან, სადაც მკაფიოდაა დაწერილი, რომ ერთ-ერთ მხარეზე თავდასხმა აღიქმება მეორე მხარეზე თავდასხმად. ჩვენ ვამუშავებთ უსაფრთხოების ერთიან კონტურს. და არცერთ ქართველ ქორს არ ეყოფა გამბედაობა, რომ ხელყონ ჩვენი სიმტკიცე სახელმწიფო საზღვრების დაცვასთან დაკავშირებით“, -განაცხადა ბიბილოვმა.
რაც შეეხება ე.წ. საზღვარს, ბიბილოვმა აღნიშნა, რომ „რა თქმა უნდა, ჩვენ ტრამპივით არ ავაშენებთ კედლებს, მაგრამ გავაგრძელებთ ჩვენი სახელმწიფო საზღვრის მოწყობას“.