საზოგადოება

რამდენიმე მეტროსადგურში კვლევითი სამუშაოები მიმდინარეობს

თბილისის რამდენიმე მეტროსადგურში კვლევითი სამუშაოები ისევ მიმდინარეობს.

როგორც თბილისის მერის მოადგილემ, მაია ბითაძემ მუნიციპალიტეტის მთავრობის სხდომის დასრულების შემდეგ განაცხდა, მნიშვნელოვანია ხარისხი და ნებისმიერი გადაცდომა კატეგორიულად მიუღებელია.

"მიმდინარეობს გარკვეული კვლევითი და შესწავლითი სამუშაოები. მეტროსადგურ „ვარკეთილთან“ დაკავშირებით ვიცით, რომ საგამოძიებო სამუშაოები გრძელდება, დანარჩენ ობიექტებზე, სადაც პროცესი იყო დაძრული, დამატებითი კვლევები ტარდება. ჩვენთვის მთავარია ხარისხი. ნებისმიერი გამოვლენილი ქმედება, რამაც შეიძლება გამოიწვიოს ადამიანის ჯანმრთელობის ხელყოფა, კატეგორიულად მიუღებელია. ნებისმიერი ხარვეზის შემთხვევაში პროცედურები თავიდან დაიწყება.

რაც შეეხება მეტრო "ვარკეთილს", მიმდინარეობს საგამოძიებო მოქმედებები. კონკრეტული შედეგები ჯერ არ გვაქვს. როცა კონკრეტული შედეგი გვექნება, რასაც ჩვენ დიდ ყურადღებას ვუთმობთ, არც ერთი პროექტი არ განხორციელდება ისე, რომ საფრთხისშემცველი იყოს სამომავლოდ, ან ხარისხი აკლდეს, ან რაიმე ხარვეზი ჰქონდეს. შესაბამისად, ხარისხის კონტროლი ჩვენთვის ერთ-ერთი პრიორიტეტია და ამ მხრივ გარკვეულ ცვლილებებსაც ვგეგმავთ. როგორც იცით, მერმა წინა კვირას მოადგილეებს დავალება მისცა, რომ დაიწყონ მუშაობა რეგულირების გამკაცრების კუთხით ხარისხის კონტროლისადმი", - განაცხადა მაია ბითაძემ.