საზოგადოება

რამდენიმე მსხვილ საწარმოში ადამიანებს დევნიან პროფკავშირული აქტიურობის გამო - გოჩა ალექსანდრია

თბილისში, სასტუმრო ,,ჰოლიდეი ინ’’- ში ფრიდრიხ ებერტის ფონდის ორგანიზებით შრომის უსაფრთხოების რიგით მე-7 კონფერენცია მიმდინარეობს.

კონფერენციის მონაწილეები დამსაქმებელსა და დასაქმებულს შორის ურთიერთობაში არსებულ ხარვეზებზე და იმაზე მსჯელობენ, რა უნდა გაკეთდეს საკანონმდებლო დონეზე ამ ხარვეზების აღმოსაფხვრელად.

დამსაქმებელთა ასოციაციის ვიცე-პრეზიდენტის, მიხეილ კორძახიას განცხადებით, კონფერენცია ეძღვნება სწორედ შრომის სფეროში კანონმდებლობის დახვეწას.

,,ჩვენ ვამახვილებთ ყურადღებას, რომ ნებისმიერი გადაწყვეტილება უნდა იყოს განხილული ეკონომიკური თვალსაზრისით, ეკონომიკური ინტერესების ჭრილში და მხოლოდ და მხოლოდ ამ შემთხევავში მიიღწევა მიზანი. დღევანდელი რეგულაციით, რომ შრომის კოდექსში არსებობს, სადაც პასუხისმგებლობა არის ცალსახად დამსაქმებელზე, ამ ნაწილში რა თქმა უნდა, მოგვიწევს მუშაობა პასუხისმგებლობის დონეების განსაზაღვრად’’, - განაცხადა მიხეილ კორძახიამ.

თავის მხრივ, როგორც კონფერენციის დაწყებამდე გაერთიანებული პროფკავშირების თავმჯდომარის მოადგილემ , გოჩა ალექსანდრიამ აღნიშნა, სხვადასახვა საწარმოში პროფკავშირული საქმიანობის გამო დასაქმებულების დევნის ფაქტები დაფიქსირდა.

,,პროფესიული კავშირები ვაპირებთ ყურადღება გავამახვილოთ იმ პრობლემებზე, რომლებიც მრავლად არის შრომითი ურთიერთობის სფეროში, მათ შორის ხარვეზიანი შრომის კანონმდებლობაზე, განსაკუთრებით ასოციაციის არსებობის კუთხით, რაც გულისხმობს პროფესიული კავშირების შექმნის თავისუფლებას. ამ კუთხით ძალიან დიდი პრობლემები გვაქვს. რამდენიმე მსხვილ საწარმოში, როგორც კერძო ისე სახელმწიფო საწარმოში, ადამიანებს დევნიან პროფკავშირული აქტიურობის გამო და სამსახურიდან დაითხოვეს რამდენიმე, მიმდინარე წელსაც, გასულ წელსაც’’, - განაცხადა გოჩა ალექსანდრაიმ.

ნინო ექვთიმიშვილი