პოლიტიკა
რასაც უმრავლესობა აპირებს, მაჟორიტარულ სისტემაზე უარესია - კახა კუკავა
პარტია „თავისუფალი საქართველოს“ თავმჯდომარის, კახა კუკავას განცხადებით, საკოორდინაციო საბჭო ითხოვს საკონსტიტუციო კომისიაში მყოფი უმრავლესობისგან, გააუქმოს მაჟორიტარული საარჩევნო სისტემა და გადავიდეს პროპორციულზე.
კუკავას თქმით, ამ მოთხოვნის შეუსრულებლობის შემთხვევაში, არასაპარლამენტო პარტიები კომისიას დატოვებენ.
„მინდა, გამოვეხმაურო ივანიშვილის ორი დემაგოგის, ჩუგოშვილისა და კობახიძის განცხადებებს, როცა ისინი ამბობენ, რომ მაჟორიტარული სისტემა უქმდება, რასაც ისინი აპირებენ, არის მაჟორიტარულ სისტემაზე უარესი სისტემის შემოღება. ამიტომ ჩვენ ვითხოვთ არა უბრალოდ მაჟორიტარული სისტემის გაუქმებას, არამედ პროპორციული სისტემის შემოღებას. ბატონ ივანიშვილს გვინდა ვუთხრათ, რომ რომ აქ ბევრი სვლა დარჩენილი არაა. 15 აპრილამდე ისინი ან ხელს აიღებენ ქვეყანაში კონსტიტუციურ გადატრიალებაზე და შენარჩუნდება ის მცირედი დემოკრატიული მონაპოვარი, რასაც ქართველმა ხალხმა 25 წლის მანძილზე მიაღწია, ან , წინააღმდეგ შემთხვევაში ყველა პოლიტიკური პარტია დატოვებს კონსტიტუციურ კომისიას და მერე წერონ ჩუგოშვილმა და კობახიძემ, სუფთა წერაში იმეცადინონ იმ კომისიაში“, - განაცხადა კუკავამ.
საკოორდინაციო საბჭო ასევე მოითხოვს პრეზიდენტის პირდაპირი არჩევის წესისა და საარჩევნო ბლოკებად ფორმირების პროცესის შენარჩუნებას, ასევე საარჩევნო ბარიერის 3%-მდე დაწევას.
ანა მებურიშვილი