პოლიტიკა
რატომ უნდა დამაკავონ, არაფერი კანონსაწინააღმდეგო არ ჩამიდენია - სამეგრელო-ზემო სვანეთის ყოფილი გუბერნატორი ლაშა გოგიას დაკავებაზე
სამეგრელო-ზემო სვანეთის ყოფილი გუბერნატორი, ლევან შონია ზუგდიდის ყოფილი მერისა და მისი მოადგილის დაკავებას გამოეხმაურა. „კურიერთან“ სატელეფონო საუბარში შონიამ აბსურდი უწოდა, თითქოს ლაშა გოგიას აიძულებდნენ მის წინააღმდეგ ჩვენების მიცემას.
„აბსურდული, აბდაუბდა თემები - რატომ უნდა აიძულონ გოგია ლევან შონიას წინააღმდეგ ჩვენების მიცემას. მე კეთილსინდისიერად ვემსახურე რეგიონსა და ქვეყანას“, - განაცხადა შონიამ.
კითხვაზე, რატომ გაათავისუფლეს თანამდებობიდან, შონიამ უპასუხა, რომ თვითონ გადაწყვიტა გადადგომა.
„კი არ გამათავისუფლეს, დავწერე განცხადება და წავედი, იმიტომ, რომ მუდმივად ხომ არ შეიძლება, ადამიანი ერთსა და იმავე ადგილას იყოს. მე გუნდის წევრად მიმაჩნია ჩემი თავი და თუ რამე შემიძლია, ყოველთვის გავაკეთებ იმას, რაც მიმაჩნია, რომ ის სიმართლეა და სწორი გზაა“, - განაცხადა შონიამ.
კითხვაზე, დაიწყო თუ არა საგამოძიებო უწყებამ მის წინააღმდეგ საქმე, შონიამ კონკრეტული პასუხი არ გასცა.
„მე ამას ვერ გეტყვით, გამოკითხვაზე ვიყავი ერთხელ და მეორეჯერაც ვიყავი. დანარჩენი უკვე გამოძიების პრეროგატივაა. მე როგორ მოგცეთ მაგაზე განმარტება , მითხარით““, - თქვა შონიამ და აღნიშნა, რომ „რატომ უნდა დამაკავონ, არაფერი კანონსაწინააღმდეგო არ ჩამიდენია“.
ზუგდიდის ყოფილი მერი ლაშა გოგია და ვიცე-მერი გია გულორდავა სუს-მა გუშინ დააკავა. მათ დიდი ოდენობით ქრთამის აღებას ედავებიან.
დაკავებულები ბრალს არ აღიარებენ, ბრალის დამტკიცების შემთხვევაში კი 11-დან 15 წლამდე პატიმრობა ემუქრებათ.