საზოგადოება

რაზეც ამ ჩანაწერში ჩემი შვილის მეგობრები საუბრობენ, აბსოლუტურად უარყვეს სასამართლოზე - ზაზა სარალიძე

ხორავას ქუჩაზე მოკლული დავით სარალიძის მამის, ზაზა სარალიძის განცხადებით, მას გამოძიებისთვის არ გადაუცია ის ჩანაწერი, რომელიც მან და ზვიად კუპრავამ გააკეთეს. სარალიძის განმარტებით, გამოძიებას ჩანაწერის გადაცემა არ უთხოვია.

„მე და კუპრავამ ერთად ჩავწერეთ. კუპრავას ვთხოვე და ჩავწერეთ. მე რატომ უნდა მიმეწოდებინა გამოძიებისათვის, თვითონ თუ არ მომთხოვა. აღარ ვენდობოდი პროკურორებს. ჩემი გადაწყვეტილება ის იყო, რომ წეღან რომელი ბავშვებიც დავასახელე, მქონდა ინიციატივა, რომ ჩამეწერა კიდევ სხვები და შემეჯამებინა, შემდეგ რა იქნებოდა და ვინ რას ისაუბრებდა“, – უპასუხა სარალიძემ ხორავას ქუჩის საქმის შემსწავლელი კომისიის წევრის, მამუკა მდინარაძის შეკითხვას: „კუპრავას მიერ გაკეთებული ჩანაწერი ახსენეთ. თქვენ თქვით, რომ გამოძიება არ დაინტერესდა და „რუსთავი 2“-ზე გავიდა ამ ჩანაწერის ნაწილი. ეს ჩანაწერი თქვენ მიაწოდეთ გამოძიებას?“.

სარალიძის თქმით, მან და ზვიად კუპრავამ ჩაწერეს დავით სარალიძის მეგობრების - დ.ნ-სა და დ.ღ-ს საუბარი. მისი თქმით, არასრულწლოვნების ნაამბობი სასამართლოზე უარყვეს.

„ჩავიწერეთ ერთ-ერთი საუბარი. მე და ზვიად კუპრავა ვიყავით ერთად. ჩავიწერე საუბარი და რაზეც ამ ჩანაწერში საუბრობენ, აბსოლუტურად უარყვეს სასამართლოზე“, – განაცხადა სარალიძემ.

სარალიძემ აღნიშნა, რომ ეჭვობდა, რომ დ.ნ-სა და დ.ღ-ს იარაღი უნდა ჰქონოდათ.

„თავიდანვე მქონდა ეჭვი, რომ ამ ორიდან, დ.ნ-ს და დ.ღ-ს ვგულისხმობ, რომელიმეს უნდა ჰქონოდა იარაღი, რაშიც შემდეგ დავრწმუნდი. ამაში ჩემი საქმის პროკურორმა, ზვიად ფხაკაძემ დამარწმუნა, რომელიც არ ფიქრობდა იმაზე, თუ რამხელა წინააღმდეგობას გავუწევდი“, – განაცხადა სარალიძემ.