საზოგადოება

რეფერენდუმი ნარკოტიკების მოხმარების დეკრიმინალიზაციასთან დაკავშირებით - „გირჩის“ ახალი ინიციატივა

დღეს გამართულ პრესკონფერენციაზე პოლიტიკური ცენტრ „გირჩის“ ერთ-ერთი ლიდერი ზურაბ ჯაფარიძე პარტიის ახალი ინიციატივა წარადგინა, რომელიც უკავშირდება საქართველოში ნარკოტიკების მოხმარების დეკრიმინალიზაციას.

აბაშიძის თქმით, ამ საკითხის რეფერენდუმზე გაყვანის შემთხვევაში, საერთო-სახალხო გამოკითხვა ოქტომბერში, თვითმმართველობის არჩევნების პარალელურად გაიმართება.

„ჩვენ გადავწყვიტეთ და ესაა ჩვენი ახალი ინიციატივა, რომ წელს, ოქტომბერში, როცა საქართველოში თვითმმართველობის არჩევნებთან ერთად ჩატარდეს რეფერენდუმი და სააქართველოს მოსახლეობამ გასცეს იმ კითხვას პასუხი, უნდა ისჯებოდეს თუ არა ნარკოტიკის მომხმარება. ჩვენ ვაპირებთ, რომ მივმართოთ შესაბამისი განცხადებით ცესკოს, სადაც შევეცდებით, დავარეგისტრიროთ ეს საკითხი, როგორც რეფერენდუმის კითხვა“, - განაცხადა ჯაფარიძემ.

აბაშიძის თქმით, საკითხის დარეგისტრირების შემდეგ მისი პარტია დაიწყებს ხელმოწერების შეგროვებას. „გირჩის“ ლიდერის აზრით, ინიციატივა 200 000-ს ხელმოწერას შეაგროვებს.

შეგახსენებთ, რომ რეფერენდუმს ნიშნავს საქართველოს პრეზიდენტი ბრძანებულებით, რომელიც საჭიროებს პრემიერ-მინისტრის კონტრასიგნაციას, გარდა იმ შემთხვევისა, როდესაც რეფერენდუმი ინიშნება საქართველოს მთავრობის მოთხოვნით.

საქართველოს პრეზიდენტი უფლებამოსილია საქართველოს პარლამენტის, საქართველოს მთავრობის, არანაკლებ 200 000 ამომრჩევლის მოთხოვნით დანიშნოს რეფერენდუმი მისი ჩატარების მოთხოვნის მიღებიდან 30 დღის განმავლობაში.

თუ რეფერენდუმზე გამოტანილ საკითხს მოსახლეობა მხარს დაუჭერს, მიღებული გადაწყვეტილება ძალაში შევა მისი გამოქვეყნების დღიდან და მას ექნება იურიდიული ძალა.

რეფერენდუმზე მიღებული გადაწყვეტილების გაუქმება ან შეცვლა მხოლოდ ხელახალი რეფერენდუმითაა შესაძლებელი. ასევე მხოლოდ საქართველოს საკონსტიტუციო სასამართლოს შეუძლია ბათილად სცნოს მისი შედეგები.

ანა მებურიშვილი