ეკონომიკა

რეფერენდუმის გარეშე შეუძლებელი იქნება გრძელვადიან პერსპექტივაში ცვლილებების შეტანა საგადასახადო სისტემაში - ირაკლი კობახიძე

პარლამენტის თავმჯდომარე კონსტიტუციის 94-ე მუხლთან დაკავშირებით ბიზნესისა და არასამთავრობო სექტორის მოთხვნას პასუხობს.

როგორც ირაკლი კობახიძემ აღნიშნა, რეფერენდუმის გარეშე საგადასახადო სისტემაში ცვლილებების შეტანა შეუძლებელი იქნება.

„სულ მცირე, კონსტიტუციაში იქნება გრძელვადიანი დათქმა, რის საფუძველზეც რეფერენდუმის გარეშე შეუძლებელი იქნება გრძელვადიან პერსპექტივაში ცვლილებების შეტანა საგადასახადო სისტემაში. არის ორი ალტერნატიული ინტერესი და ორი ალეტერნატიული არგუმენტაცია - მმართველობითი და სამართლებრივი კუთხით. რა თქმა უნდა, უმჯობესია ასეთი ნორმა არ არსებობდეს კონსტიტუციაში იმიტომ, რომ დაკავშირებულია საპარლამენტო სუვერენიტეტის პრინციპთან, მთავრობის კომპეტენციების შესაბამისად მოწესრიგების პრინციპთან. მეორე მხარეს დგას ეკონომიკური ინტერესები.

ჩვენი ამოცანა მდგომარეობს იმაში, რომ გაგრძელდეს მაღალი ტემპით ეკონომიკური განვითარება, შევინარჩუნოთ მდგრადი განვითარების დინამიკა. ამიტომ აუცილებელია ის გზავნილი, რომელიც ჩადებულია კონსტიტუციაში გადასახადების ხელშეუხებლობის კუთხით, დარჩეს ძალაში", - განაცხადა ირაკლი კობახიძემ.

გასულ კვირას თორმეტმა ბიზნესასოციაციამ და 8 არასამთავრობო ორგანიზაციამ კონსტიტუციაში 94-ე მუხლის უცვლელად დატოვება მოითხოვეს, რომლის მიხედვით, ახალი საერთო-სახელმწიფოებრივი გადასახადის შემოღებისთვის, ან უკვე არსებული გადასახადების განაკვეთის გაზრდისთვის (გარდა აქციზისა) რეფერენდუმის ჩატარებაა აუცილებელი. ისინი აცხადებენ, რომ ეს აუცილებელია ქვეყნის ეკონომიკური ზრდისა და განვითარებისთვის, სტაბილური ბიზნეს და საინვესტიციო გარემოს შენარჩუნებისათვის.

მუხლის გაუქმების ინიციატორების - სოციალ დემოკრატების თქმით კი, ჩანაწერი მნიშვნელოვნად ზღუდავს საკანონმდებლო ორგანოს პასუხისმგებლობას და ვალდებულებას, განსაზღვროს ქვეყნის საგადასახადო და ეკონომიკური პოლიტიკა.

ისინი ბიზნესგაერთიანებებს 19 ივნისს საკითხზე დისკუსიას სთავაზობენ.

მონიკა დავლიანიძე