მოზაიკა
რა უნდა ვიცოდეთ ნერვის ანთების შესახებ
ნერვის ანთება საკმაოდ გავრცელებული პრობლემაა, რომელსაც მძაფრი და გაუსაძლისი ტკივილები ახლავს თან. ამ პრობლემის გამომწვევი მიზეზი შეიძლება იყოს რაიმე სახის ტრავმა, ტოქსიკური მოწამვლა, ინფექციური და ონკოლოგიური დაავადებები, ასევე, ხერხემლის მალთა-შორის თიაქარი, შაქრიანი დიაბეტი და დაქვეითებული იმუნიტეტი. ნერვის ანთების სიმპტომებია:
● ტკივილი,
● დაბუჟება,
● მოძრაობის შეზღუდვა.
ნერვის ანთება სხეულის სხვადასხვა ნაწილში შესაძლოა განვითარდეს. ყველაზე ხშირია:
● მხრის ნერვის ანთება - ამ დროს ადამიანს უჭირს ხელის მოძრაობა და შესაბამისად, საქმის კეთებაც. მხრის ნერვის ანთებას სხვადასხვა გამომწვევი მიზეზები აქვს - მაგალითად, შესაძლოა ეს იყოს სამშობიარო ტრავმა. გარდა ამისა, ეს დაავადება შეიძლება განვითარდეს სპორტული აქტივობის დროს. ავტოსაგზაო შემთხვევა, დაცემა და სხვადასხვა ტიპის ტრავმა კი მხრის ნერვის ანთების ერთ-ერთი გავრცელებული მიზეზია.
● იდაყვის ნერვის ანთება - შესაძლოა გამოიწვიოს ფიზიკურმა აქტივობამ, ტრავმამ და მყესის დაზიანებამ, ასევე დაჭიმულობამ ან ანთებამ. მისი გამომწვევი მიზეზებია ასევე: არასწორ მდგომარეობაში დიდხანს ყოფნის დროს ზეწოლა, არასწორად მორგებული თაბაშირის ან ფიქსატორის ზეწოლა, უბედური შემთხვევები და სხვ.
● კისრის ნერვის ანთება - ამ დროს ხერხემლის ზედა ნაწილის მალთაშუა დისკი განიცდის დეგენერაციასა და ნერვს აწვება. დეფორმირებული დისკი ეხება და აღიზიანებს ზურგის ტვინიდან გამომავალ ნერვულ ფესვებს, რასაც შესაბამისი ადგილის ფუნქციის მოშლამდე მივყავართ.
როგორ ავიცილოთ თავიდან ნერვის ანთება?
ნერვის ანთების დროს აუცილებლად უნდა გაიაროთ კონსულტაცია პირად ექიმთან. თუ საქმე ნევრიტთან გაქვთ, უნდა დადგინდეს ნერვის დაზიანების ჭეშმარიტი მიზეზი და დაინიშნოს ამ მიზეზის წინააღმდეგ მიმართული მკურნალობა. ნერვის ანთების თავიდან ასაცილებლად აუცილებელია იმუნიტეტის გაძლიერება, ასევე ეცადეთ, რომ ერთ მდგომარეობაში დიდხანს არ გაჩერდეთ, რადგან არასწორად ხანგრძლივი დროის განმავლობაში ყოფნა - ამ პრობლემის პროვოცირებას იწვევს. ამ დაავადების პრევენციისთვის ასევე რეკომენდებულია ვარჯიში და მცირე ფიზიკური დატვირთვა.