პოლიტიკა
რესპუბლიკური პარტია ცესკო-ს მიერ მიღებულ დადგენილებას სასამართლოში ასაჩივრებს
უსუფაშვილი-რესპუბლიკელები, ცესკო-ს გუშინდელ გადაწყვეტილებას, პარტიებისთვის კენჭისყრის გარეშე საარჩევნო ნომრის მინიჭების შესახებ მიღებულ დადგენილებას, სასამართლოში ასაჩივრებენ.
როგორც პარტიის თავმჯდომარე ხათუნა სამნიძემ სასამართლოში მისვლისას ჟურნალისტებს განუცხადა, აღნიშნული გადაწყვეტილებით ცესკომ საარჩევნო კოდექსის მე-119 მუხლი დაარღვია.
„ჩვენ ვასაჩივრებთ გუშინ სხდომაზე მიღებულ ცესკო-ს გადაწყვეტილებას , დადგენილებას, სადაც მან მიიღო მიკერძოებული გადაწყვეტილება, უკანონო გადაწყვეტილება და მიანიჭა რიგ პარტიებს ის შესაძლებლობა რომ წილისყრის გარეშე აიღონ მათ საარჩევნო ნომერი. ეს არის ცალსახად საარჩევნო კოდექსის მე-119 მუხლის დარღვევა. ამას ვასაჩივრებთ და ვითხოვთ ამ დადგენილების გაუქმებას“,-განაცხადა სამნიძემ.
შეგახსენებთ, რომ ცესკო-ს განმარტებით, კომისიამ აღნიშნული გადაწყვეტილება თანაბარი საარჩევნო გარემოს შესანარჩუნებლად მიიღო.
„ვინაიდან 2016 წლის 8 ოქტომბერს იმართება საპარლამენტო არჩევნები, რიგგარეშე და საკრებულოს ადგილმონაცვლის არჩევნები, შესაძლებელია შექმნილიყო სიტუაცია, როდესაც პოლიტიკურ სუბიექტებს ერთ არჩევნებში ესარგებლა ერთი ნომრით, ხოლო მეორე არჩევნებში სხვა ნომრით. შესაბამისად, ეს გამოიწვევდა დაბნეულობას და შექმნიდა უხერხულობას საარჩევნო კამპანიის მიმდინარეობისას“,-განაცხადეს ცესკო-ში.
ცესკო-ში სხდომის ჩატარებამდე ახალი მემარჯვენეები და პატრიოტთა ალინსის წევრები აცხადებდნენ, რომ სუბიექტისთვის საარჩევნო ნომრის მინიჭება წილისყრის გარეშე უნდა მოხდეს, რადგან, მათი თქმით, მათ უკვე მინიჭებული აქვთ 2014 წელს ადგილობრივი არჩევნების შედეგად საარჩევნო ნომერი და გასულ წლებშიც ამ ნომრით იღებდნენ არჩევნებში მონაწილეობას.
რესპუბლიკურ პარტიაში კი, პირიქით საუბრობდნენ იმაზე, რომ საარჩევნო კოდექსის 119 მუხლის თანახმად, პოლიტიკურ პარტიებს საარჩევნო ნომრები წილისყრით უნდა მიენიჭოთ 2-დან 8 სექტემბრამდე პერიოდში. წილისყრის გარეშე რიგითი ნომრის არჩევის უფლება აქვს მხოლოდ იმ სამ პოლიტიკურ სუბიექტს, რომლებმაც წინა საპარლამენტო არჩევნებზე ყველაზე მეტი ხმა მიიღეს.
მონიკა დავლიანიძ