კონფლიქტის ზონა
რის საფუძველზე მოხდა ქართველი ტყვეების გადაცემა თბილისისთვის? - აფხაზური მხარის განმარტება
დრანდის ციხიდან გიორგი ლუკავას გათავისუფლება და თბილისისთვის გადაცემის ფაქტი ოკუპირებული აფხაზეთის დე-ფაქტო რესპუბლიკაში მითქმა-მოთქმის საბაბი გახდა. ამის გამო დე-ფაქტო პრეზიდენტის რაულ ჰაჯიმბას ადმინისტრაციამ მოსახლეობას საგანგებო წერილით მიმართა.
„2017 წლის 25 დეკემბერს აფხაზეთ-საქართველოს საზღვარზე აფხაზურმა მხარის მიერ საქართველოსთვის გიორგი ლუკავას გადაცემა წარმოადგენს პატიმართა გაცვლის პროცესის გაგრძელებას, რომელიც დაიწყო სამხრეთ ოსეთის რესპუბლიკის ხელისუფლების თხოვნით.
2008 წლის მოვლენების შედეგად, საქართველოს ჯარების შეჭრის დროს აყვანილი იყვნენ სამხრეთ ოსეთის მოქალაქეები, რომელთაც საქართველოში ხანგრძლივი პატიმრობა, მათ შორის სამუდამო პატიმრობა მიუსაჯეს.
ყურადღებას ვამახვილებთ იმ ფაქტზე, რომ ლუკავა გასაცვლელთა სიაში ადრეც იყო, თუმცა მისი გაცვლა იმ დროს დროებით შეჩერდა, მოგვიანებით კიდევ ერთი პატიმარი გიორგი გიუნაშვილი, რომელიც სამხრეთ ოსეთის რესპუბლიკამ გადმოგვცა, გაცვლილი იყო როლანდ ჟიბაზე, რომელიც საქართველოს აფარებდა თავს და ბ. კვიცინიას მკვლელობისთვის იყო ეჭვმიტანილი.
საჭიროდ მივიჩნევთ, განვუმარტოთ საზოგადოებას , რომ მრავალი წლის განმავლობაში საქართველოში სხვადასხვა მძიმე დანაშაულისთვის თავს აფარებენ აფხაზეთის მოქალაქეები. მათ შორის რუსი დიპლომატის დიმიტრი ვიშერნევის მკვლელი. აფხაზური მხარე ყველაფერს აკეთებს ამ ადამიანების გადმოცემისთვის. ეს საკითხები IPRM და ჟენევის დისკუსიების ფარგლებში მიმდინარე ყველა დონეზე და შეხვედრაზეა დასმული.
შესაძლოა, ვინმეს არ აწყობდეს ის ფაქტი, რომ აფხაზეთის მოქალაქეები, რომელთაც ჩადენილი აქვთ დანაშაული და თავს საქართველოში აფარებენ , აფხაზეთს უნდა გადაეცეს და ჩვენი კანონმდებლობის შესაბამისად სასჯელი მოიხადონ.
მეტიც, გაუწყებთ, რომ ომის დასრულების შემდეგ, ქართულ მხარეს ის მოქალაქეები გადაეცა, რომლებმაც აფხაზეთის ტერიტორიაზე სხვადასხვა სიმძიმის დანაშაული ჩაიდინეს, ისეთები როგორიცაა გოგოხია, უგრეხელიძე, კეკელია, გერხელია, მამასახლისი და სხვა. იმ პერიოდში ამას არ გამოუწვევია რაიმე აღშფოთება ან გაუგებრობა მათი მხრიდან, ვინც დღეს სიტუაციის გამწვავებას ცდილობს.
პატიმართა გაცვლის მსოფლიო პრაქტიკას უკავია ადგილი საერთაშორისო ურთიერთობებში და მათი პრობლემების მოგვარების ერთ-ერთ ინსტრუმენტს წარმოადგენს. ზემოაღნიშნულიდან გამომდინარე, მივმართავთ ჩვენი ქვეყნის მოქალაქეებს თხოვნით, გამოიჩინონ სიმშვიდე და არ აჰყვნენ პროვოკაციებს“, - წერია განცხადებაში.
ანა მებურიშვილი