უახლესი ამბები
არქივი
პოლიტიკა
რისთვის დააკავეს მიხეილ სააკაშვილის მხარდამჭერი? - უმაღლესი რადას დეპუტატის ვერსია
უკრაინის შინაგან საქმეთა მინისტრის მრჩევლისა და უმაღლესი რადას დეპუტატის, ანტონ გერაშენკოს მტკიცებით, მიხეილ სააკაშვილის დაკავებული მომხრე ალექსანდრ ბურცევი პოლონეთ-უკრაინის საზღვარზე მესაზღვრეებზე ძალადობდა. შესაბამისი ვიდეოთი ის სააკაშვილის თანაპარტიელის, დავით საყვარელიძის ბრალდებას ფეისბუკის საკუთარ გვერდზე უპასუხა, რომ ოდესის ყოფილი გუბერნატორის მომხრეების წინააღმდეგ მასობრივი რეპრესიები დაიწყო.
„დავით საყვარელიძემ განაცხადა, რომ პროვოკატორ სააკაშვილის მომხრეების წინააღმდეგ მასობრივი რეპრესიები დაიწყო. კერძოდ კი, დაკავებულია ალექსანდრ ბურცევი.
როგორც ყოველთვის, დავითმა მოიტყუა და ის [მისი ფეისბუკპოსტი] სიამოვნებით გააზიარეს ძირითადმა უკრაინულმა მედიასაშუალებებმა ისე, რომ შეკითხვაც არ გასჩენიათ - რისთვის დააკავეს ალექსანდრ ბურცევი?
თუმცა, შეიძლება ვცდები და დავითმა არ იცის, რისთვის დააკავეს?
შემიძლია დავეხმარო მას, მედიასაშუალებებსა და მოქალაქეებს ამ საკითხის გარკვევაში და ჩემი შეფასება მივცე სააკაშვილის „ბოევიკ-ტიტუშკას“ ალექსანდრ ბურცევის ქმედებებს.
ვიდეოზე ალექსანდრ ბურცევმა (ულვაშებით, წვერითა და შავ ბერეტში) განსაკუთრებული ცინიზით, თავისი უდანაშაულობის ხაზგასმით, სცემს და ხელს კრავს უკრაინის დამცველებს - მესაზღვრეებს, რომლებიც ასევე იცავდნენ უკრაინას ანტიტერორისტულ ოპერაციებში“, - დაწერა გერაშენკომ.
შეგახსენებთ, დღეს საქართველოს ყოფილი პრეზიდენტისა და ოდესის ექს-გუბერნატორის, მიხეილ სააკაშვილის თანამებრძოლისა და პარტია „ახალი ძალების მოძრაობის“ წევრის, დავით საყვარელიძის ინფორმაციით, სააკაშვილის მხარდამჭერების დაჭერა დაიწყეს. მისი ტქმით, დაკავებული არიან ანდრეი კოტიჩენკო და ალექსანდრ ბურცევი.
10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.
აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.
ანა მებურიშვილი