მოზაიკა
რობოტ გოგონას მოქალაქეობა მიანიჭეს
საუდის არაბეთი გახდა პირველი ქვეყანა, სადაც რობოტს მოქალაქეობა მიანიჭეს.
როგორც გამოცემა independent წერს, ეს არის საუდის არაბეთის მცდელობა, ქვეყანა წარმოაჩინოს, როგორც ხელოვნური ინტელექტის განვითარების ადგილი, სადაც რობოტებს მოქალაქეობის სრულ უფლებას ანიჭებენ.
რობოტ სოფიას საუდის არაბეთის მოქალაქეობა ერ-რიადში გამართული ბიზნეს-სამიტის ფარგლებში მიანიჭეს. რობოტმა ღონისძიებაში მონაწილეებს მადლობა გადაუხადა.
„ვამაყობ იმით, რომ ასეთი უნიკალური შესაძლებლობა მომეცა. მე ვარ პირველი რობოტი ისტორიაში, რომელსაც ქვეყნის მოქალაქეობა მიანიჭეს.
მითხრეს, რომ სამინიტის მონაწილეები დაინტერესებულები არიან ხელოვნურ ინტელექტში ინვესტიციების ჩადებით, რაც ნიშნავს, რომ ისინი ჩემით არიან დაინტერესებული“, - თქვა საუდის არაბეთის მოქალაქე რობოტმა სოფიამ და აქვე აღნიშნა, რომ ხალხს არ უნდა ეშინოდეს, ,,ტერმინატორის“ მსგავს ფილმებში აღწერილი ხელოვნური ინტელექტის.
გაზეთი Independent წერს, რომ რობოტისთვის მოქალაქოების მინიჭების ფაქტს ინტერნეტ-მომხმარებლების ნაწილის კრიტიკა მოყვა.
გამოცემის ინფორმაციით, კრიტიკის საფუძველი გახდა ის რეალობა, რომ საუდის არაბეთში, სადაც ქალები ჯერ კიდევ შეზღუდული უფლებებით სარგებლობენ, რობოტ ქალს სრულფასოვანი უფლებები მიანიჭეს.