კომენტარი
როდესაც „იბერიასთან“ დაკავშირებით კეთდება კომენტარები, რომ ეს არის ბიზნესის პრობლემები, ეს ძალიან გაცვეთილი და მოძველებული ჩარჩოა - ანა ნაცვლიშვილი
მედია დემოკრატიული სახელმწიფოს ჟანგბადია, ამ ჟანგბადის შემცირება პირდაპირ აისახება ქვეყნის დემოკრატიისა და მოქალაქეების ცხოვრების ხარისხზე, - განუცხადა ჟურნალისტებს პრეზიდენტის საპარლამენტო მდივანმა ანა ნაცვლიშვილმა ტელეკომპანია „იბერიასთან“ დაკავშირებულ მოვლენებზე საუბრისას.
მისი თქმით, ბიზნესზე შესაძლო ზეწოლის გარდა, „იბერიას“ საქმეში მედიის თავისუფლების საკითხიც ძალიან მნიშვნელოვანია.
„ძალიან მნიშვნელოვანია, რომ უკვე გავრცელებულ ჩანაწერებს, მათი ავთენტურობის შეფასებსასთან ერთად, სამართლებრივი შეფასება მოყვეს. გაჟღერდა, რომ აქ შეიძლება იყოს სისხლის სამართლის დანაშაული, ელიტურ კორუფციაზე კეთდება კომენტარები და ასე შემდეგ.
ეს არ არის მხოლოდ ბიზნესზე შესაძლო ზეწოლის საკითხი, თუმცა, თავის მხრივ ბიზნესის თავისუფლება და ხელშეუხებლობა არის მნიშვნელოვანი, მაგრამ ბიზნესთან და სავარაუდო კორუფციულ თემებთან ერთად ვერ დავივიწყებთ, რომ აქ არის ძალიან მნიშვნელოვანი საკითხი - მედია, რომელიც დემოკრატიული სახელმწიფოს ჟანგბადია. ამ ჟანგბადის შემცირება პირდაპირ აისახება ამ ქვეყნის დემოკრატიისა და მოქალაქეების ცხოვრების ხარისხზე.
როდესაც „იბერიასთან“ დაკავშირებით კეთდება კომენტარები, რომ ეს არის ბიზნესის პრობლემები და ბიზნესმა უნდა გადაიხადოს გადასახდები, ვფიქრობ, ეს ძალიან გაცვეთილი და მოძველებული ჩარჩოა, რომელშიც ეს საქმე ცალსახად ვეღარ ჯდება.
ჩვენ კარგად გვახსოვს „რუსთავი 2“-ის საქმესთან მიმართებაშიც მესიჯი იყო ის, რომ ეს იყო ორ კერძო სუბიექტს შორის დავა და სახელმწიფოს არაფერი ჰქონდა მასთან საერთო, მაგრამ ყველა ეტაპზე ძალიან ნათლად ჩანდა სახელმწიფოს ჩართულობა“, - განაცხადა ანა ნაცვლიშვილმა.